Túrkistan oblysynda «COVID-19» indetimen kúres kezinde erekshe eńbegimen, el alǵysyna bólengen medısına salasynyń qyzmetkerleri marapattaldy. Oblystyq qoǵamdyq densaýlyq basqarmasynyń basshysy Marat Pashımov óńirdegi epıdemııalyq jaǵdaıdyń turaqtalýyna súbeli úles qosqan aq halattylarǵa alǵys bildirdi, dep habarlaıdy Egemen.kz
Oblystyq klınıkalyq aýrýhanasynyń dárigeri Vıachaslav Soı – úzdik dáriger, Túrkistan qalalyq ortalyq aýrýhanasynyń meıirbıkesi Elmıra Seıitova – úzdik meıirbıke atanyp, saltanatty sharada marapattaldy. Al №1 oblystyq perınataldyq ortalyǵy – úzdik medısına mekemesi dep tanyldy.
«О́tken jyl jalpy halyqqa aýyr bolǵany belgili, ásirese, densaýlyq saqtaý salasynyń qyzmetkerlerine qıyn boldy. Osy qıyndyqty el bolyp jeńe bildik. Bul meniń ǵana marapatym emes, barlyq áriptesterime kórsetilgen qurmet dep bilemin. Osy bir eńbegimizdi elep, mereıimizdi asyryp otyrǵan qoǵamdyq densaýlyq basqarmasyna alǵys aıtqym keledi. Endi mundaı jaısyz jaǵdaılar bolmasa eken dep tileımin», dedi Túrkistan qalalyq ortalyq aýrýhanasynyń meıirbekesi E.Seıilhanqyzy.
Aıta keteıik, óńirde densaýlyq saqtaý salasynda jalpy 23 585 maman jumys isteıdi. Qazirgi tańda oblysta 88 naýqas koronavırýs aýrýyna baılanysty em qabyldaýda.