TMD Mıssııasynyń halyqaralyq baqylaýshysy Valentın Kolıasev Almatydaǵy jalpyqalalyq baspasóz ortalyǵynda ótken brıfıngte saılaý ýchaskelerinde eshqandaı zańbuzýshylyqtardyń oryn almaǵanyn atap ótti, dep habarlaıdy Egemen.kz
V.Kolıasevtiń aıtýynsha, TMD Mıssııasynan Qazaqstanda ótip jatqan saılaýǵa qatysý úshin 234 adam akkredıttelgen. Onyń 4-eýi Almatyda jumys istep jatyr.
«Biz tańerteń 10-ǵa jýyq ýchaskege bardyq. 4 ýchaskeniń ashylýynda boldyq. Saılaý ýchaskelerinde eshqandaı zańbuzýshylyqty baıqamadyq. Tek kitaphana mańynda jastardyń jınalǵany bolmasa, is júzinde daýys berýge kedergi keltiretin buzýshylyqtar baıqalmady. Jastardyń ne úshin toptasqany belgisiz. Biraq bul top polısııanyń arqasynda tez tarady», dedi halyqaralyq baqylaýshy.
V.Kolıasev atap ótkendeı, úı-jaılardyń ishindegi saılaý prosesin uıymdastyrýǵa keletin bolsaq, barlyǵy joǵary deńgeıde ótýde.
«Bizdi qorǵanys kostıýmderi men maskalary bar adamdar qarsy aldy, maska kıip, temperatýrany ólshedi. Zalda baqylaýshylar úshin 10 oryn boldy. Jumystyń basynda da, proseste de barlyǵy jazataıym oqıǵasyz, QR zańnamasynyń normalary boıynsha oryndaldy. Saılaýshylar ózderin abyroımen, sabyrly, laıyqty ustady. Syrtqy jaǵynan komıssııaǵa da, saılaýshylarǵa da qysym bolǵan joq. Meniń oıymsha, bul turǵyda bári oıdaǵydaı boldy», dep atap ótti V.Kolıasev.
Baqylaýshy sanıtarlyq normalardyń saqtalýyna erekshe nazar aýdardy.
«Barlyq sanıtarlyq normalar saqtaldy. Baqylaýshylar bir-birinen 2 metr qashyqta otyrdy. Barlyǵy betperde, sanıtaızer, arnaıy halattar men kaska kıdi. Barlyǵy sanıtarlyq-epıdemıologııalyq erejelerdi buzbaıtyndaı etip jasalǵan», dedi V.Kolıasev