О́tken jyldyń birinshi jartyjyldyǵynda óńirde 148 sıyr, 216 jylqy, 497 qoı jáne 4 túıe urlanǵan. Sonyń ishinde aýyldyq jerlerde alys jaıylymdardaǵy qaraýsyz júrgen sıyr, jylqylardyń kóbirek urlanýyna kóbinese mal baǵýǵa jaýapty malshylardyń óz jumystaryna salǵyrt qaraýy sebepshi. Sońǵy jyldary mal urlyǵy da uıymdasqan sıpat ala bastady.
Burynǵy ýaqytta urylar da alystan kelmeıtin bolsa, sońǵy jyldary qaı jaqtyń urysy kelip, alyp ketkenin jurt bile almaı dal. О́ıtkeni, bul qylmysqa ábden mashyqtanǵan qaskúnemder maldy birden soıyp, etin satyp jiberetindikten, qylmysty dáleldeý ońaıǵa soqpaıdy. Osylaısha qylmystyń bir sheti mal bazarlaryndaǵy et satýshylarǵa da kelip tireledi. Mal urlyǵyna qatysty zań talaptary qatańdatylǵanyna qaramastan, qylmys kúz ben qys kezinde tipti kúsheıe túsedi.
Polıseıler «qylmyspen kúresýdiń eń tıimdi tásili – onyń aldyn alý», deıdi. Aýyl adamdary beıqam otyrmaı, mal baǵý jumystaryn ózderi uıymdastyryp, aýyl ákimderi men ýchaskelik polıseıler turǵyndar arasynda túsindirý jumystaryn júrgizýi kerek. О́ıtkeni, osy kezge deıin urlanǵan maldyń negizgi bóligin jaıylymda qaraýsyz júrgen jeke adamdardyń maly quraıdy. Sonyń ishinde kúzgi ýaqytta kúzetti kúsheıtip, sharýashylyqtar mal qoralaryna dabyl qondyrǵylary men jaryq ornatýy qylmystyń aldyn alýdyń eń tóte joly.
Aqtóbe oblystyq PD bastyǵy Atyǵaı Arystanovtyń aıtýynsha, endi mal urlyǵy úshin QK 188-1 baby boıynsha, 3000 AEK deıin (8 334 000 teńgege deıin) aıyppul salynady nemese 5 jylǵa deıin bas bostandyǵynan aıyrý jazasy qarastyrylǵan. Jeke turǵyn úı-jaı nemese sharýashylyqtyń, kásiporynnyń qorasynan mal urlaǵandarǵa 5 jyldan 10 jylǵa deıin bas bostandyǵynan aıyrý jazasy kesiledi. Sondaı-aq uıymdasqan túrde qylmys jasaǵandardyń birneshe maldy urlaǵandary dáleldense, qolǵa túskender 7 jyldan 12 jylǵa deıin bas bostandyǵynan aıyrý jazasyna kesiledi. Tártip saqshylary mal baǵý jumysy jaqsy uıymdastyrylyp, janýarlarǵa en-tańba japsyrmalary salynyp, GPS trekerleri paıdalanylǵan, qysqasy mal urlyǵyn aldyn alý sharalary qabyldanǵan aýdandarda jaz ben kúzde qylmys tirkelmegenin habarlady. Al alys aýyldarda jaıylymdaǵy mal burynǵysynsha qaraýsyz júredi. Sondyqtan polıseıler, ásirese kúz-qys aılarynda tebindegi jylqylaryna abaı bolýǵa shaqyrady.
Aqtóbe oblysy