Pandemııa saldarynan oryn alǵan úzilisten keıin komandalyq sport saıysy Túrkistan qalasynda bastaý aldy. Tórt komanda baq synaıtyn irikteý týr tórt kúnge jalǵasady. Saıys kezinde barlyq karantın talaptary qatań saqtalady, dep habarlaıdy Egemen.kz
Ulttyq mektep lıgasy aıasynda voleıboldan mektep oqýshylary arasynda uıymdastyrylǵan qalalyq irikteý oıyndaryn tamashalaýǵa kelgen Túrkistan oblysynyń ákimi О́mirzaq Shókeev oqýshylarǵa sáttilik tiledi.
«Adal jáne jigerli kúsh synasýda jeńiske degen úmitterińizdi úzbeńizder. Udaıy shyńdalyp, sheberlik pen mashyqty jınaqtaýǵa umtylyńyzdar. Aldaǵy ýaqyttarda Týymyzdy árdaıym, álemniń barlyq núktelerinde jańa jeńistermen jelbiretip, sizderge amanat eter eń basty baılyǵymyz, bizdiń barsha tabystarymyzdyń kilti – el birligin saqtaýǵa kúsh salýlarýyńyzǵa tilektespin», dedi oblys ákimi.
Ulttyq mektep lıgasy aıasynda fýtbol, basketbol, gandbol, voleıboldan ótetin jarysta oqýshylarǵa sport mektebinen bapker, kásibı maman bekitilgen. Lıga jarystary chırlıdıng, ıaǵnı úılesimdi sport túri formatynda uıymdastyrylady.
Ár mektep komandalarynyń óz logotıpteri men urandary jasalǵan. Arnaıy sporttyq formalarymen qamtamasyz etilgen. Mektep oqýshylaryn jarysqa arnaıy avtobýstar tasymaldaıdy. Bul lıgada oblystaǵy eń úzdik degen sportshy oqýshylar óner kórsetedi.
Jeńimpaz bolǵan komanda oblystyq, respýblıkalyq, halyqaralyq mektep oqýshylary arasynda sporttyq jarystarǵa qatysyp, el namysyn qorǵaıdy. Naýryz aıynda oblystyq chempıonatta ár aýdan, qaladan úzdik komandalar ózara irikteýge qatysyp, jeńimpazdar marapattalady.