Túp tegi brıtandyq bolyp tabylatyn Italııa ánshisi, sazger ári saıahatshy Son Paskaldyń Qazaqstanda júrgenine eki jylǵa jýyqtap qalypty. Alaıda, qazir elimizde bul jigitti bilmeıtin jastar az.
Túp tegi brıtandyq bolyp tabylatyn Italııa ánshisi, sazger ári saıahatshy Son Paskaldyń Qazaqstanda júrgenine eki jylǵa jýyqtap qalypty. Alaıda, qazir elimizde bul jigitti bilmeıtin jastar az.
Jat elde júrip jalyqqan soń óz eline qaıtatyn shyǵar degen qonaǵymyz, bizdiń elimizge baýyr basyp qana qoımaı, baqytyn da Qazaqstannan tapqan sııaqty. Jańa shyǵarmalarynda qazaq tilin qoldanyp, qazaq halqynyń ánderin shyrqaıtyn jigit ózinde eshqandaı bóten oıy joq, ulttyq máselelerge bas qatyrmaıtyndyǵyn, kózdegeni de, izdegeni de tek qana taza mýzyka ekenin aıtyp-aq keledi.
О́tken jyly Son Paskal ózimizdiń tanymal akterlerdiń biri Ánýar Nurpeıisovpen birigip salǵan «Englishman in Shimkent», «Chaıka Aıgýl» ıýmorlyq klıpteri arqyly tanymal bolyp shyǵa kelgen-di. Bastapqydaǵy álemdik charttarda bul klıpter eń kóp qaralǵan ánderdiń qatarynda bolǵan. Sonnyń «Abaıdyń «Kózimniń qarasyn» da azdap óz maqamyna salyp shyrqaǵan romantıkalyq klıpi kóńilden shyqty. Qysqasy, ǵalamtor arqyly mýzyka tyńdaǵandy jaqsy kóretin jastar arasynda bul ánder reıtıngisin joǵaltqan joq. Qazir onyń «Janym sol» sıngli charttarda kósh bastap tur.
Qazaq tilinde án aıtyp, qazaqtyń atyn alty qyrdan asyryp júrgen ıtalııalyq ánshi Son Paskal endi óziniń tyńdarmandaryn kezekti jańalyǵymen qýantyp qana qoımaı, bul joly tipti tańǵaldyrmaq nıette. Ol «Mahabbat» atty jańa ánine elimizdiń bas qalasy – Astanada realıtı-shoý janrynda jańa beıneklıp túsirgen.
«Jigitke jeti óner de az», demekshi Son Paskal ózi ánshi, ózi sazger, tipti operator jáne rejısser bolyp baǵyn synap kórdi. Beıneklıpti túsirý úshin ánshi qolyna kamera alyp, jańa týyndysy – «Mahabbat» ánin aıta júrip, bir kúnde Astana qalasyn aralap shyqty. Basty kóshelerden bastaý alyp, Esildiń boıyn jaǵalaǵan avtor qalalyq №4 mektep, L.N.Gýmılev atyndaǵy Eýrazııa ulttyq ýnıversıteti, áýejaı, «Han shatyr», «Kerýen» oıyn-saýyq ortalyqtary, tipti sporttyq jattyǵý oryndaryna deıin baryp, halyqtyń kóńilin kóterdi, astanalyqtardy armansyz bıletti. Osynyń bári beıneklıpte qaz-qalpynda qamtylǵan.
«Mahabbat» ániniń sózin jas aqyndar jazsa, sazyn ánshiniń ózi shyǵarǵan. Ǵashyqtyq sezim, súıispenshilik – beıneklıptiń negizgi taqyryby. Al basty ereksheligi – munda esh jasandylyq joq. Bul jerde óner dese ishken asyn jerge qoıatyn halyqtyń shynaıy yqylasy ǵana bar. Osyndaı qarapaıymdylyǵymen, talantymen ıtalıandyq ánshi halyqqa taǵy da jaqyndaı tústi.
«Aıdaladan kelip», bizdiń ana tilimizdi qoldaýǵa ynta-shyntasymen kirisip ketken Son Paskal deıtin kim ózi deıtin bolsaq, ol óz elinde jap-jaqsy tanymal ánshilerdiń biri. Áıgili «aTunes-2011» mýzykalyq jobasynyń fınalısi.
Sonymen, ótken jyly ǵalamtordy kezip ketken «You should speak qazaqsha» klıpin túsirýge ózimizdiń jergilikti mýzykanttar septesip, qazaq prodıýseri Jomart Súleımenov kómektesken-di.
Son Paskaldyń Qazaqstanǵa tap bolýy da qyzyq. Konsertterdiń birinde ony Dına esimdi qazaq qyzy qazaq jerine qonaqqa shaqyrǵan eken. Ánshi jigitti áýesqoılyq jeńip, buryn kórmegen elge qydyryp kelýge bel baılaıdy. Alaıda, az ǵana kúnge qydyrystap kelgen elde ol uzaq ýaqytqa qalyp qoıamyn dep tipti de oılamaǵan. Sheteldik ánshi bir kórgennen unatqan elinde óziniń kompozıtorlyq qabiletin múlde jańa qyrynan synap kórýge bolatyndyǵyn túısinse kerek. Shoý-bıznestiń taptaýryn jolynan taıqyp shyǵa kelgen ıtalııalyq ózin munda udaıy týrıst retinde sezinbeý úshin birden til úırenýge den qoıady. Qazaq tilin nasıhattaýǵa degen ıdeıa da osydan bastaý alǵany belgili. Aınalasyna juǵymdy, aqjarqyn, romantıkany jaqsy kóretin jigitti bizdiń mýzykanttar da bóten kórmeı, qataryna qosyp alǵan. Qazir osyndaǵy dostarymen Almatydaǵy mýzykalyq keshterden qalmaıtyn ánshiniń álimsaqtan kele jatqan qonaqjaılyqqa qoıatyn mini joq. Jańa ómirine dán rıza.
Aınash ESALI,
«Egemen Qazaqstan».
ALMATY.