«Qazaqstan» respýblıkalyq teleradıokorporasııasyna qarasty elordalyq basty aqparat quraldarynyń biri – «Astana» radıosy 1999 jyly 19 qańtarda alǵash ret efırge shyqty. Sol ýaqyttan beri radıoarna elordamen qatar damyp keledi. Kóbinese jastar aýdıtorııasyn qamtıtyn «Astana» radıosy 22 jyl ishinde sapaly mýzyka jáne qyzyqty shoý-baǵdarlamalarmen tyńdarmandar júreginen oryn alyp úlgerdi, dep jazady Egemen.kz
Radıo memlekettik jastar saıasatyn negizge ala otyryp, áleýmettik-ekonomıkalyq, mádenı-aǵartý salasyndaǵy ózekti taqyryptardy kóteredi. Eki tilde habar taratatyn radıoarna tikeleı efırde kúndelikti saǵat tańǵy 7.00-den túngi 01.00-ge deıin jumys isteıdi. Qazirgi ýaqytta efırde aqparattyq-tanymdyq «Eńseli elorda», «Áleýmet tynysy», «Jańǵyrý joly», «Soyle KZ», «Medısına dlıa vseh», «Vremıa delovyh» habarlary jáne «Juldyzdy elorda», «Mýzykalnyı dojd» atty mýzykalyq baǵdarlamalary, sonymen qatar «Bizdiń ýaqyt», «Qaıyrlytańsy», «Live Bar», «TO SAMOE ShOÝ» syndy radıo-shoýlary júrip jatyr.
2013 jyldyń qarashasynan bastap «Astana» radıosy tikeleı efırde beınekórsetilim rejıminde jumys isteıdi. 2015 jyldan bastap efırge shyǵyp jatqan radıokonsert janryndaǵy jobalar otandyq radıolar arasynda alǵashqy bolyp sanalady. Youtube jelisi men Facebook áleýmettik paraqshasynda efırdegi baǵdarlamalardy live formatta tamashalaýǵa bolady.
Radıoujymnyń jekelegen jobalary eki márte QR Tuńǵysh Prezıdenti - Elbasy N.Á.Nazarbaevtyń Alǵysymen marapattaldy. Sondaı-aq 2017 jyly jýrnalıstıka salasyna arnalǵan tuńǵysh ulttyq «Úrker» baıqaýynda «Úzdik aımaqtyq radıostansııa» nomınasııasynda jeńiske jetti.
Búgin, 19 qańtarda «Astana» radıosynyń merekelik efırin Youtube jelisi men Facebook áleýmettik paraqshasynda tamashalaýǵa bolady. Efırdi radıoda ár jyldary habar júrgizgen jýrnalıster tizgindeıdi.