Tehastyq áıel kvue.com vırtýaldy arnasyna ǵalamdyq pandemııa kezinde 6 aı boıy О́zbekstanda qalaı qalyp qoıǵany týraly suhbat berdi, dep habarlaıdy Egemen.kz.
Ol bastapqyda О́zbekstanǵa orys jáne ózbek tilderin úırený úshin 45 kúndik saparmen kelgen. COVID-19 pandemııasynyń saldarynan memleketter shekaralaryn japqan kezde, ol taǵy 5 aı turaqtap qalǵan.
Tehas shtatynan kelgen Djennıfer Ýıddon óz oqıǵasyn eshteńemen salystyrýǵa kelmeıtin úlken tájirıbe sanaıdy.
«Keıbir adamdar syrtqa shyqqandy nemese kóńildi bolǵandy unatady. Al men saıahattaǵandy jaqsy kóremin. Árdaıym ózge eldiń mádenıetin túsinýdi, basqa nárseni baǵalaýdy qalaımyn», - deıdi Ýıddon.
Dál osy oı ony 2020 jyldyń basynda О́zbekstanǵa jetelep ákeldi. Ol orys jáne ózbek tilderin úırený úshin saıahatqa shyǵýǵa bel býǵan eken.
«Men О́zbekstanda 45 kún bolýdy josparladym. Sodan keıin jeksenbide maǵan shekara jabylady degen habarlama keldi», - dedi ol.
Elshilik oǵan AQSh-qa oralǵysy kelse, segiz saǵatta astanaǵa jetý kerektigin eskertedi.
«Men oıanǵanda áskerıler bizdiń aýdandardy qorshap jatty. Sonymen qatar bir qaladan ekinshi qalaǵa aýysa almaıtyndaı shekteý qoıyldy. Ol kezde men astanadan bes saǵattyq ýaqyt alatyn qashyqtyqta edim», - dep túsindirdi ol.
Sol sebepten Djennıfer Ýıddon óz saparynyń budan da uzaqqa sozylatynyn josparlaı bastaǵan.
«Men aınalamdaǵy adamdarmen sóılesýge qınaldym. Biraq olar meni jumysqa tartý arqyly 30 kúndik jospar qurýǵa kómektesti. Men ol jerde jumys istemedim, biraq erikti túrde repetıtorlyqpen aınalystym», - deıdi áıel.
Osylaısha, bir jarym aıǵa sozylýy kerek bolǵan sapar alty aıǵa ulasady. Eshqashan osynsha ýaqyt bolamyn dep oılamaǵan el onyń úıine aınaldy. Onyń sózine qaraǵanda, beıtanys adamdar jaqynyndaı kórinip, dos bolyp úlgergenge uqsaıdy.
Ol buryndary kezdestirmegen adamdarmen baılanys ornatyp, olardyń mádenıetin zertteýge jáne óz eliniń erekshelikterimen bólisýge kóp ýaqytyn arnaǵan.
Aıta keteıik, ol AQSh-ta turyp qalǵan О́zbekstan azamattaryn alyp ketý úshin ushyp barǵan reıspen otanyna oralǵan.
Ol keterinen buryn úsh kún boıy tanystarymen qoshtasyp shyqqan. Qazir onyń qolynda bar bolǵany eshteńemen aıyrbastaýǵa kelmeıtin estelik fotosýretter ǵana qaldy.
«Qudaı-aý, bul meniń ómirimdegi eń jaman jyl boldy. Men О́zbekstanda uzaq ýaqyt qalyp qoıdym» dep kijinsem bolar ma edi?! Biraq men, árıne, olaı jasamaımyn, óıtkeni sol sapardaǵy erekshe sátterdi ǵana oılaýǵa, jaqsy jaǵynan qaraýǵa tyrysamyn», - deıdi Djennıfer Ýıddon.