Álemde óziniń azattyǵy úshin ǵasyrlar boıy kúresin úzbeı jalǵastyrǵan jáne túbinde qolyn jetkizgen ulttardyń biri – qazaqtar. Sondyqtan halqymyz úshin Táýelsizdik – kıeli, qasterli uǵym! Biz onyń qadiri men kıesin túsingen elmiz.
Prezıdent Q.Toqaevtyń «Táýelsizdik bárinen qymbat» atty maqalasynda bıylǵy jyldyń qaıta jańǵyrǵan qazaq memlekettiginiń, ata-babalarymyz ańsaǵan azattyqtyń tuǵyry nyǵaıa túskenin áıgileıtin mańyzdy beles ekendigine basa ekpin túsirilgen.
Táýelsiz memleket retinde jahandyq kóshke ilesken jańa Qazaqstan irgetasynyń qalanýy, azattyǵymyzdy nyqtaý, keregemizdi keńeıtý jáne mereıli elge aınalýdyń ońaı soqpaǵany bárimizge málim. Prezıdentimiz atalǵan maqalasynda egemendiktiń otyz jyldyq ǵumyryna taldaý jasaı kele, ony úsh onjyldyqqa bólip, eńsergen belesterimizdi, baǵyndyrǵan bıikterimizdi, qol jetkizgen tabystarymyzdy tarqata baıandaǵan. Tarıh tamyryna tereńdeı boılasaq, osynaý saıyn dalada kóshpeliler órkenıetin qalyptastyrǵan, kindik qany tamǵan týǵan jerin jáne erkindigin qasyq qandary qalǵansha qorǵaǵan ata-babalarymyz taǵdyrdyń talaı tarshylyǵyn, qıyn-qystaý kezeńdi, náýbetti jyldardy ótkerdi. Onyń ber jaǵynda keńestik dáýirdiń zulmattaryn da bastan keshirdik. Biraq moıymadyq, tabandylyq tanyttyq. О́rligimiz ben rýhtyń asqaqtyǵy ult retinde joıylyp ketýden saqtady. Osyny túısingen adamǵa kerektiniń bári atalǵan maqalada kórinis tapqan. Búginde bizdiń kórshi eldermen halyqaralyq zańdarǵa negizdelip, resmı bekitilgen shekaramyzǵa, tutastyǵymyzǵa kúmánmen, qyzǵanyshpen qarap, arandatýshylyqqa boı aldyryp júrgen shetel azamattarynyń áreketterine de Prezıdentimiz maqalasynda ǵylymı negizdep toıtarys bere bilgen.
Ár qazaqtyń kókeıinde júrgen, elimizdiń ishki, syrtqy saıasatyna qatysty jahandyq suraqtarǵa jaýap bolatyndaı máseleler qamtylǵan. Keleshekte ondaı kórshi memlekettermen aradaǵy tatýlyqqa syna qaǵýshylyqqa jol bermes úshin, atqarylar ıgi isterge jol siltegen, ıaǵnı «bizdiń ulttyq múddeni aspen de, taspen de qorǵaýǵa daıyn bolýymyz qajettigin» basa aıtqan. Táýelsizdikti alý bar, biraq ony qorǵap qalý, baıandy etý, keleshek urpaqtyń qolyna amanattaý mynadaı myń qubylǵan, almaǵaıyp zamanda ońaı emes. Sondyqtan da Prezıdentimiz aıtqandaı, «Táýelsizdik bárinen qymbat» degen sózi máńgilik uranymyzǵa aınalýy kerek!
Aqylbek KÚRIShBAEV,
Senat depýtaty