Álemge jaıylǵan pandemııa kezinde jasy ulǵaıǵan jandardyń densaýlyǵy barshamyzdy alańdatqany ras. Sondyqtan da Almaty ákimdigi áleýmettik jobalardy iske asyrý aıasynda «Belsendi uzaq ómir» jol kartasy boıynsha jumysyn jalǵastyrý ústinde. Maqsaty – aǵa urpaqty belsendi zııatkerlik, shyǵarmashylyq, qoǵamdyq qyzmetke tartý arqyly qart adamdardyń ómirin uzartyp, qoǵamdaǵy rólin arttyrý.
Almatyda Belsendi uzaq ómir súrýge septesetin 9 ortalyqqa 21 myńnan astam adam tirkelgen, 300,7 myń ardager onyń qyzmetterimen qamtylǵan.
Byltyr tótenshe jaǵdaı jarııalanýyna baılanysty Belsendi uzaq ómir súrý ortalyqtaryna qashyqtan qyzmet kórsetýge týra keldi. Gerıator, psıholog, medbıke keńesteri onlaın nemese telefon arqyly júrgizildi. Skandınavııalyq júris, oqytý kýrstary, shahmat, bı sııaqty aǵzany shyńdaıtyn sabaqtar onlaın ótkizildi. Barlyǵy 4 706 zeınetker onlaın qyzmet aldy. Qarttar kúni men aılyǵyna arnalǵan is-sharalarǵa 1,5 myń adam qatysty. Sonymen qatar 200 zeınetker úshin ekskýrsııalar ótkizildi.
Budan basqa Almaty qalasynyń ákimi Baqytjan Saǵyntaevtyń tapsyrmasymen «Shyńǵa órleý» áleýmettik klýby jobasyn iske asyrý bastaldy. Maqsaty – kishi mektep jasyndaǵy balalarǵa ómirlik tájirıbe, bilim men daǵdylardy berý arqyly qıyn ómirlik jaǵdaıǵa tap bolǵan aǵa býyn ókilderin qoǵamdyq ómirge tartý. Klýbtyń ókilderi zeınetkerler, eńbekke qabiletti múgedek adamdar, az qamtylǵan kóp balaly otbasylardan shyqqan 1-4 synyp balalary, erekshe qajettilikteri bar balalar boldy. Onlaın rejiminde az qamtylǵan otbasylardan shyqqan 510 bala klýbtarmen qamtyldy. Oflaın rejiminde 390 bala oqıdy. Zeınetkerler men múgedektigi bar adamdardan 72 pedagog jumysqa ornalastyryldy.
Almatyda iske asyrylyp jatqan áleýmettik jobalardyń biri – «Táýelsiz ómir mektebi». Onda óz múmkindikterin bilmeý nemese otbasy tarapynan jasalatyn gıperqamqorlyq saldarynan qoǵamnan oqshaý qalǵan múgedek jandardy qoldaý sharalary kórsetiledi. Atap aıtqanda, múgedektikke baılanysty qorqynysh pen belgisizdikti jeńý, ózin ózi baǵalaýdy arttyrý jáne maqsat qoıý daǵdylaryn qalyptastyrý jáne óz ómirin josparlaý jumystary júrgizilip otyr. 48 múgedek adam jattyqtyrýshylardyń qatysýymen «Aq Bastaý» saýyqtyrý pansıonatyna ornalastyrylyp, 7 kúndik kýrsta oqydy. Sondaı-aq 172 adamdy qamtıtyn «Ten Qoǵam» múmkindigi shekteýli adamdardy jumysqa ornalastyrý ortalyǵy» jobasy iske asyrylýda. Bul bastama da múmkindigi shekteýli jandardyń biliktilik alyp, jumysqa ornalasýyna kómek kórsetýdi kózdeıdi.
ALMATY