Jezqazǵandaǵy tarıhı-arheologııalyq mýzeıde bapker Meıirimhan Erálıev sadaq atýdan sheberlik synybyn ótkizdi. «Bes qarý» dep atalǵan bul dáriske jas ólkentanýshylar ǵana emes, murajaı qyzmetkerleri de qatty qyzyǵýshylyq tanytty.
Taǵylymdy is-sharanyń atalǵan mýzeı qabyrǵasynda ótýi tegin emes edi. Munda Ortalyq Qazaqstanda júrgizilgen arheologııalyq qazba kezinde tabylǵan jebelerdiń ushtary kóptep saqtalǵan. Bapker Meıirimhan Eralıev osy jádigerlerdi mysalǵa keltire otyryp, balalarǵa sadaq atý óneriniń tarıhy týraly qyzǵylyqty áńgimeler aıtyp berdi.
Jalpy Meıirimhan Eralıev óskeleń urpaq ókilderin sadaq atý ónerine tegin baýlyp júr. Onyń pikirinshe, aldaǵy ýaqytta qalada sadaq atý sporty mindetti túrde damıdy eken. «О́ıtkeni, – deıdi bapker, – Jezqazǵanda sporttyń osy túrine degen jastar arasyndaǵy qyzyǵýshylyq óte zor. Olardyń ishinde talanttylary da barshylyq. Tipti, úlkenderdiń ózi kelip, úıretýge qolqa salyp jatady».
Koronavırýs ınfeksııasyna baılanysty qazirgi ýaqytta sadaq atý úıirmesine kelýshilerdiń sany birshama kemigen. Áıtse de, kórshi Sátbaev qalasynan birneshe ata-ana kelip, balalaryn úıirmege ákelýge nıet bildiripti. Al Meıirimhan Eralıevtiń ózi mańaıdaǵy aýyldarǵa shyǵyp, ondaǵy balalarǵa sadaq atý óneriniń álipbıin úıretip júr.
Qaraǵandy oblysy,
Jezqazǵan qalasy