10-13 aqpan aralyǵynda Nur-Sultanda «Qazaqstan Hockey Open-2021» dep atalatyn halyqaralyq týrnır ótedi. Bul jarysqa jerlesterimizden bólek, Reseı men Belarýs quramalary qatysady.
Joǵaryda atalǵan komandalardyń ekeýi de azýly. Máselen, Reseı quramasy 2018 jyly Phenchhanda alaýy tutanǵan Olımpııa oıyndarynda jeńimpaz atansa, 1998 jyly Naganoda kúmis jáne 2002 jyly Solt-Leık-Sıtıde qola medaldi ıelendi. Álem chempıonattarynda olar 5 altyn, 3 kúmis jáne 5 qolany enshiledi. Sondaı-aq, kezinde dańqy dúrkirgen KSRO quramasynyń negizin dál osy reseılikter quraǵanyn da esten shyǵarmaǵan jón. Belarýs hokkeıshileri 2002 jylǵy Olımpıadada tórtinshi orynǵa taban tirese, 2006 jylǵy álemdik dodada altynshy satyǵa jaıǵasty. Olar basqa da týrnırlerde táýir nátıje kórsetýde.
Árıne, Qazaqstan quramasy ondaı kórsetkishterimen maqtana almaıdy. Sol sebepti de Nur-Sultandaǵy týrnır aǵymdaǵy jyldyń 21 mamyry men 6 maýsym aralyǵynda Latvııada ótetin álem chempıonaty qarsańynda bizdiń jigitter úshin úlken tájirıbe mektebi bolatyny daýsyz.