Ál-Farabı atyndaǵy Qazaq ulttyq ýnıversıteti Jýrnalıstıka fakýltetiniń E. Sháımerdenov atyndaǵy aýdıtorııasyda kórnekti memleket jáne qoǵam qaıratkeri, tanymal jazýshy pýblısıst Sapar Baıjanovtyń týǵanyna 90 jyl tolýyna oraı 27 qańtarda «Ultynyń umytylmas tulǵasy – sapar Baıjanovtyń shyǵarmashylyǵy» halyqaralyq ǵylymı-tájirıbelik onlaın-konferensııa ótedi, dep habarlaıdy Egemen.kz.
Sapar Baıjanov elimizdiń aǵa basylymy «Sosıalıstik Qazaqstan» (qazirgi «Egemen Qazaqstan») gazetine uzaq jyldar basshylyq jasap, mádenı jáne áleýmettik damýymyzǵa súbeli úles qosqan. Bas redaktor, qalamy júırik jýrnalıst, ǵalym, fılologııa ǵylymdarynyń kandıdaty Sapar Baıjanov osy oqý ornynyń túlegi. «Zamandas týraly tolǵaý», «Arhıv-aıǵaq», «Abaı jáne arhıv», «Qajyǵa barǵan qazaqtar» syndy zertteýleriniń avtory - Sapar Baıjanov. Qazaq memlekettik ýnıversıtetiniń jýrnalıstıka fakýltetin 1952 jyly bitirgen soń jastar basylymy «Lenınshil jas» (qazirgi «Jas Alash») gazetiniń ádebı qyzmetkeri, jumysshy jastar bóliminiń meńgerýshisi, redaktordyń orynbasary bolyp istegen. 1958–1965 jyldary «Mádenıet jáne turmys» (qazirgi «Parasat») jýrnalynyń jaýapty hatshysy, redaktordyń orynbasary, Bas redaktory bolǵan, 1965– 1973 jyldary Qazaqstan Kompartııasy Ortalyq komıtetiniń apparatynda jaýapty qyzmetter atqarǵan. 1973–1983 jyldary «Sosıalıstik Qazaqstan» (qazirgi «Egemen Qazaqstan») gazetiniń bas redaktory bolyp istegen. 1983–1994 jyldary respýblıka Bas Muraǵat basqarmasynyń bastyǵy bolǵan. Qazaqstannyń eńbek sińirgen qaıratkeri ataǵyn ıelengen. «Halyqtar Dostyǵy», «Qurmet Belgisi» ordenderimen, kóptegen medaldarmen marapattalǵan. Ol jaıynda «О́mirge ókpesi joq adam» atty estelikter jınaǵy jaryq kórgen. Zamandastary oǵan «qazaq jýrnalıstıkasynyń qara jorǵasy, qarymdy qalamger, bilgir ǵalym» dep baǵa bergen.
Ǵylymı sharaǵa Qazaqstan Jazýshylar jáne Jýrnalıster Odaǵy, sheteldik ǵalymdar, Respýblıkalyq BAQ basshylary men tanymal jýrnalıster, qoǵam jáne memleket qaıratkerleri, zııaly qaýym ókilderi men professor-oqytýshylar quramy qatysady.
Konferensııa aıasynda ǵalym shyǵarmashylyǵyna arnalǵan kórme ótedi.