Aqmola oblysynda júzdegen jolaýshy qarly burqasyn saldarynan mejeli jerine jete almaı, jarty jolda qalyp qoıdy. Bul týraly «Astana» telearnasy habarlady.
Aımaqta uıytqyp soqqan jel jolaýshylardy ábigerge saldy. Tótenshe jaǵdaılar qyzmetiniń eskertýine qulaq aspaı, jolǵa shyqqandardyń kóligi qar qursaýynan shyǵa almaı qalǵan. Mundaı oqıǵa «Astana-Petropavl» jolynyń Jańatalap aýylyndaǵy bóliginde tirkelip, 15 adam qaýipsiz jerge kóshirildi. Sonymen birge, Aqkól aýmaǵyndaǵy joldan 85 adam qutqaryldy. Qar arasynan 4 jolaýshy arshyp alynǵan eken.
Jambyl oblysyna qarasty Shaqpaq jáne Kúıik asýlarynda kólikterdiń borannyń saldarynan júre almaı qalǵany týraly derek te tirkeldi. Búgin elimizdiń barlyq óńirlerinde tuman túsip, jeldiń jyldamdyǵy sekýndyna 20 metrge deıin bolady dep boljanýda. Osyǵan oraı, mamandar alys saparǵa shyqpaý kerektigin eskertedi.
Baqytbek Keneshuly.
Derekkóz: «Astana» telearnasy