QazUÝ IT, ınnovasııalyq jáne medıko-bıologııalyq klasterlerdi qamtıtyn «Ál-Farabı» ǵylymı-tehnologııalyq alqabyn (ǴTA) qurý jónindegi iri ınvestısııalyq jobany iske asyrýǵa kiristi.
Ál-Farabı atyndaǵy QazUÝ túrkııalyq «Görkem Co.» kompanııasymen IT-tehnologııalar, ınnovasııalar men medısına salasyndaǵy zertteýlerdi damytý jáne joǵary bilikti mamandardy daıarlaý úshin qajetti obektiler qurylysyn bastaý týraly uzaq merzimdi ınvestısııalyq kelisimge qol qoıdy. Taraptar kelisimdi kezeń-kezeńimen iske asyrý týraly ýaǵdalastyqqa qol jetkizdi. Investısııanyń jalpy somasy – 1 mlrd dollar.
Búginde álemniń jetekshi ýnıversıtetteri adamı kapıtaldy qalyptastyra otyryp, ınnovasııalyq ekonomıkanyń ósý núktesi retinde óz elderi men tutas óńirlerdiń damýyn aıqyndaýda. Damyǵan elderdiń ozyq tájirıbesi kórsetip otyrǵandaı, mundaı tehnologııalyq alqaptar ǵylym, bilim jáne ınnovasııalyq óndiristiń úshtuǵyrlyǵy negizinde iri ýnıversıtetter bazasynda qalyptasady.
QazUÝ maqsatty túrde álemdik deńgeıdegi zertteý ýnıversıtetine aınala otyryp «Ál-Farabı» ǵylymı-tehnologııalyq alqabyn qurý bastamasyn alǵa tartty. Joba Elbasy N.Nazarbaevtyń qoldaýyna ıe boldy. Álemniń 150-den astam jetekshi joǵary oqý ornyn biriktiretin «Jańa Jibek joly ýnıversıtetteriniń Alıansy» halyqaralyq IT-klasterin qurý boıynsha jumys júrgizilýde. Onyń ózegin «Silicon Valley» modelindegi IT-tehnopark jáne QHR úkimetiniń granty boıynsha QazUÝ-ǵa usynylatyn sýperkompıýter quraıdy. Bul týraly kelisimge el Prezıdenti Q.Toqaevtyń Qytaıǵa sapary barysynda qol jetkizildi.
Sondaı-aq ǴTA quramyna ınnovasııalyq jáne medıko-bıologııalyq klasterler kiredi. Ǵylymı-zertteý zerthanasy bar 500 oryndyq kóp salaly klınıka salynatyn bolady. Medıko-bıologııalyq klasterdi qurý álemdik deńgeıde medısınalyq qyzmetter kórsetýge, zamanaýı tehnologııalar transfertin júzege asyrýǵa, sonymen birge Ońtústik Koreıa, Kanada, Túrkııa jáne AQSh medısınasyndaǵy menedjmenttiń ozyq tájirıbesin paıdalanýǵa múmkindik beredi.
«Iri ınvestısııalyq jobany iske asyrý úshin biz QazUÝ-dy kezdeısoq tańdaǵan joqpyz. Biz senimdi ári bolashaǵy zor seriktes tabý maqsatynda qazaqstandyq bilim berý naryǵyn muqııat zerttedik. Ǵalamdyq reıtıngte 165-orynǵa ıe túrki jáne ıslam áleminiń úzdik ýnıversıtetimen yntymaqtastyq halyqaralyq deńgeıdegi jobany júzege asyrýda jańa múmkindikter ashyp, dostas elderimizdiń qarym-qatynasyn odan ári nyǵaıtýǵa múmkindik beredi», dedi kezdesý barysynda «Görkem Co.» kompanııasynyń bas dırektory Osman Mımarsınanoglý.
Shartqa sáıkes ınvestor obektilerdi salyp, olardy qajetti jabdyqtarmen jabdyqtaıdy jáne memlekettik menshikke tapsyrady. Shyǵyndardy óteý birlesken operasııalyq qyzmet esebinen júzege asyrylady. Aǵymdaǵy jyly ınvestısııalyq jobanyń birinshi kezeńin iske asyrýdy bastaý josparlanýda.