Memleket basshysy Qasym-Jomart Toqaevtyń tóraǵalyǵymen ótken Úkimettiń keńeıtilgen otyrysynda el damýyna serpin beretin mańyzdy máseleler kóterildi. Bul rette Prezıdent ekonomıkalyq qylmystarmen kúres máselesin de nazarǵa alyp, utymdy usynys jasady.
Otyrys barysynda Memleket basshysy ekonomıkalyq júıeni basqarý kezindegi daǵdarysqa qarsy sharalardyń negizgi baǵyt-baǵdaryn atap ótti. Sondaı-aq aldaǵy ýaqytta qolǵa alynatyn ekonomıkalyq ósimdi qalpyna keltirýge negizdelgen reformalardy aıqyndap berdi.
Máselen, Memleket basshysy Ekonomıkalyq qylmystarmen kúres agenttigi qurylatynyn málimdedi. Meniń oıymsha, bul bastamany memleketti strategııalyq deńgeıde basqarýdy nyǵaıtýdyń, ınstıtýsıonaldyq reformalardyń tıimdi qadamy dep baǵalaýǵa bolatyn sekildi. Árıne, atalǵan agenttiktiń qyzmettik mindetteri aldaǵy ýaqytta anyqtalady. Degenmen, Prezıdenttiń sózine qaraǵanda, bul vedomstvo «kóleńkeli» ekonomıkaǵa qarsy kúresti kúsheıtetinin ańǵarýǵa bolady.
Bulaı dep boljam jasaýdyń óz sebebi bar. Máselen, el Prezıdenti memleket pen bıznestiń qarym-qatynasyn sıfrlandyrýdy usyndy. Iаǵnı, Memleket basshysy jeke kásipkerlerdi onlaın-kassalyq mashınalar men POS-termınaldardy qoldanǵan jaǵdaıda salyqtyq esep berýden bosatý máselesin qarastyrýdy tapsyrdy. Menińshe, jańadan qurylatyn Ekonomıkalyq qylmystarmen kúres agenttigi kásipkerlerdiń bosańsyp ketpeýine yqpal etedi.
Bekjan SADYQOV,
Prezıdent janyndaǵy Qazaqstan strategııalyq zertteýler ınstıtýtynyń aǵa ǵylymı qyzmetkeri, ekonomıka ǵylymdarynyń magıstri