Prezıdent Qasym-Jomart Toqaev Úkimettiń keńeıtilgen otyrysynda jaıylymdar máselesine arnaıy toqtaldy. Aýyl adamdarynyń baılyǵy – jaıylym. Sol arqyly olar ózderiniń órisin keńeıtip, tabysyn arttyryp, jaǵdaıyn jaqsartyp otyr. Malyn jaıatyn jer taba almaý – úlken problema.
Prezıdent Úkimetke Bas prokýratýramen birlesip, jyl sońyna deıin bos jatqan jaıylymdyq jerlerdi ıelerinen qaıtaryp alýdy tapsyrdy. Elimizde jaıylymǵa arnalǵan jer jetkilikti. Alaıda ony rettep, qadaǵalap otyrǵan jergilikti atqarýshy organ joq. Sonyń saldarynan aýyl adamdary qazir qıyn jaǵdaıda qaldy. Tipti, keıbir eldi mekenderdiń mańaıyn mal taptap, topyraqqa aınaldyrǵan. О́zge jerdi keıbir sharýashylyqtar menshigine alyp alǵan. Ne ózderinde mal joq, ne basqa maldy jibermeıdi. Prezıdent aıtyp ótkendeı, jaıylymdardyń 99 paıyzy qojalyqtardyń ıeliginde. 36 paıyzy ǵana qoldanysta, al qalǵan 46 mln gektar jaıylym bos jatyr.
Elimizde «Jaıylymdar týraly» zań bar. Tek oǵan jergilikti atqarýshy organdar pysqyryp ta qaramaıdy. Zań boıynsha maly joq sharýashylyqtardyń jaıylymdyq jerin qaıtaryp alýǵa bolady. Bul talaptardy sharýa qojalyqtary eskermeıdi, al jergilikti atqarýshy organ baqylamaıdy. Eki ortada zardabyn halyq shegip otyr.
Májilis depýtaty retinde osy máselege baılanysty Úkimetke birneshe ret saýal joldadym. Alaıda bul másele sol jabýly kúıinde qaldy. Memleket basshysynyń osy problemaǵa nazar aýdaryp, naqty tapsyrmalar bergeni oryndy dep esepteımin. Prezıdenttiń sheshilmeı turǵan ózekti máseleni kóterýi aýyl turǵyndaryn qýantqany anyq.
Jeksenbaı DÚISEBAEV,
Parlament Májilisiniń VI shaqyrylym depýtaty