О́kinishke qaraı, sońǵy ýaqytta obyr keseli beleń alyp tur. Qaterli isikke shaldyqqandar arasynda balalar da bar. Jyl saıyn Qazaqstanda 600-deı baladan qaterli isik tabylady. Al dertti balalarǵa tıimdi em-dommen qatar psıhologııalyq turǵydaǵy kómektiń ózi de – orasan demeý.
Osy aptada Almatydaǵy Qazaq onkologııa jáne radıologııa ǵylymı-zertteý ınstıtýtynyń balalar onkologııasy ortalyǵyna Baıan Maqsatqyzy kelip, saýapty iske muryndyq boldy. Ol balalar onkologııasy ortalyǵyna jańa termopottar, mıkrotolqyndy peshter, teledıdar, kóp fýnksııaly qurylǵy, ádemi tósek japqyshtar jáne emdelip jatqan balalarǵa basqa da qajetti jáne paıdaly syılyqtardy syıǵa tartty.
QazOjRǴZI balalar onkologııasy ortalyǵynda kishkentaı pasıentter hımııa jáne sáýlelik terapııa alyp emdeledi. Bul ortalyq QazOjRǴZI-da 1979 jyly ashylǵan jáne osy jyldar ishinde onda myńdaǵan bala emdelip shyqty.
Bıyl balalar onkologııasy ortalyǵy tolyq jóndeýden ótti. Onda jaıly jáne jaryq palatalar jasalyp, jeldetý júıesi men santehnıka tolyǵymen ózgertildi, qabyrǵalar men edender arnaıy medısınalyq materıalmen qaptaldy, balalar alańy jabdyqtaldy jáne ortalyqtyń barlyq jerine aýdıojúıe ornatylyp, jańa jıhaz satyp alyndy, sonymen qatar múgedekter arbalaryn kóterý úshin arnaıy lıft ornatyldy.
Jóndeý jumystaryna kerekti 70 mln teńgeni belgisiz bolyp qalýdy qalaǵan almatylyq kásipker berip otyr. Mine, osylaı Almatydaǵy balalar onkologııasy bólimshesinde jan jylytar saýapty ister atqarylyp jatqan jaıy bar.
Sondaı-aq bıyl atalmysh ortalyqta Samsung kompanııasynyń atynan jasalǵan smart-bólme paıda boldy. Onda balalar ınternet arqyly robottehnıkamen jáne basqa da qyzyqty nárselermen aınalysa alady.
Sonymen qatar QazOjRǴZI-dyń balalar onkologııasy ortalyǵyna «Amıla» qoǵamdyq qory men «Help Today» qoǵamdyq qorynyń eriktileri de kóp jyldardan beri óz úlesterin qosyp keledi.
ALMATY