«Sıfrlyq Qazaqstan» baǵdarlamasy aıasynda qyzylordalyqtardyń sıfrlyq saýattylyǵyn arttyrý úshin keń kólemdi is-sharalar atqarylýda. Nátıjesinde turǵyndar HQO-ǵa barmaı-aq, smartfonnyń kómegimen mobıldi qosymshalar arqyly qyzmetterdi belsendi túrde alýda. Atap aıtar bolsaq, Jyl kóleminde «eGov mobile» qosymshasyna oblys boıynsha 50 myńnan astam qyzylordalyq tirkelip, 175 385 qyzmetti onlaın alǵan. Bul týraly óńirlik kommýnıkasııalar qyzmetiniń aqparat alańynda «Azamattarǵa arnalǵan úkimet» memlekettik korporasııasynyń fılıal dırektory Aıdyn Qaırýllaev baıandady, dep habarlaıdy Egemen.kz.
Aıta keteıik, 2020 jyly fılıaldyń front-ofısteri sapaly qyzmet kórsetý boıynsha reıtıngte respýblıka kóleminde eki jyl qatarynan 1 orynda keledi.
«2020 jyly Halyqqa qyzmet kórsetý ortalyǵy arqyly 628 783 memlekettik qyzmet kórsetildi, sonyń ishinde dástúrli túrde 623 000 ótinish, al elektrondy túrde 5 783 ótinish qabyldandy. Bul kórsetkishter 2019 jylmen salystyrǵanda 36 % azaıǵan. Sebebi memlekettik qyzmetterdiń deni elektrondyq formatqa aýystyryldy, sondaı-aq qyzylordalyqtardyń sıfrlyq saýattylyǵy artyp, elektrondy-sıfrlyq qoltańbalarymen memlekettik qyzmetterdi óz betinshe ala bastady», - dedi fılıal dırektory Aıdyn Qaırýllaev.
Aıta keteıik, memlekettik qyzmetterge qoljetimdilikti jeńildetý úshin Sıfrlyq damý, ınnovasııalar jáne aeroǵarysh ónerkásibi mınıstrligi tanymal ınternet platformalarǵa onlaın qyzmetterdi shyǵarý týraly sheshim qabyldady. Qazirgi tańda Kaspi.kz, Halyk Bank, Alfa Bank jáne Sberbank qosymshalarynda jeke kásipkerlerdi tirkeý qyzmeti iske qosylyp, jumys isteýde. Aldaǵy ýaqytta da bul úrdis jalǵasyn tappaq.
Sondaı-aq «Azamattarǵa arnalǵan úkimet» memlekettik korporasııasy 2020 jyldyń aıaǵynda QR-kod qoldaný arqyly tólem jasaý jáne HQO jumysyn baǵalaý múmkindigin engizgen bolatyn. Halyqpen keri baılanysty nyǵaıtý maqsatynda engizilgen QR-baǵalaý arqyly búgingi tańda 500-den astam azamat óz pikirlerin qaldyryp, Halyqqa qyzmet kórsetý bólimderi jumysynyń sapasyn baǵalap úlgerdi.
Osynaý qıyn kezeńde qaımyǵyp qalǵan buqaranyń kóńilin aýlap, janyn jadyratý úshin birneshe aı buryn HQO-da «Biz jylý syılaımyz» atty jańa ıgi bastama paıda boldy. Osy oraıda ómirindegi mańyzdy oqıǵalarǵa oraı qujat rásimdeýge kelgen qyzmet alýshylarǵa qujattaryn saltanatty túrde tabystaý dástúri qolǵa alynyp, búginde HQO-ǵa kelgen myńnan astam azamatqa qurmet kórsetilip, estelik syılyqtar tabystaldy.
«Biz halyqqa sapaly qyzmet kórsetip, qyzmet alýshylar úshin ońaı ári jyldam qyzmet kórsetýimiz qajet. Búginde álem ózgerýde, onymen birge biz de ózgerýimiz kerek. Bizdiń maqsatymyz - qyzmet alýshylardy jigerlendirip, qýanyshyn bólisip, jylýlyq syılaý», - dedi Aıdyn Bókenbaıuly.