Qazaqstan tarıhy men dúnıejúzi tarıhy boıynsha biryńǵaı oqýlyq ázirlenedi. Bul týraly Úkimet otyrysynda Bilim jáne ǵylym mınıstri Ashat Aımaǵambetov aıtty, dep habarlaıdy Egemen.kz
«Memleket basshysynyń tapsyrmalaryn oryndaý boıynsha jumys júıeli túrde júrgizilip jatyr. Balabaqshalardy damytý boıynsha keshendi jospar ázirlendi. Onda vaýcherlik júıeni engizý, balabaqshalarmen qamtý, jańa memlekettik standart qabyldaý jáne balabaqshalarda qolaıly jaǵdaı jasaý sharalary qarastyrylady. Memleket basshysy tapsyrǵan sýmen jabdyqtaý, ystyq sýmen qamtamasyz etý,káriz máseleleri boıynsha jaǵdaı slaıdta kórsetilgen. Ásirese, Túrkistan, Qostanaı, Shyǵys, Soltústik, Batys Qazaqstan, Aqmola jáne Aqmola oblystarynda bul problema ózekti. Másele bekitilgen merzimde sheshilýi kerek», dedi mınıstr.
Onyń aıtýynsha, ınklıýzıvti bilimdi damytýǵa sáıkes, erekshe balalarǵa arnalǵan uıymdardyń ashylý normatıvi 50 myń balaǵa bir psıhologııalyq-medısınalyq, pedagogıkalyq keńes esebinen ózgertý josparlanady. Sondyqtan qosymsha 46 PMK jáne 25 túzetý kabınetterin qurý qajet. Bul erekshe balalar úshin aýadaı qajet shara.
«Búginde PMK-ǵa eń úlken qajettilik Túrkistan, Almaty, Qaraǵandy, Atyraý oblystarynda jáne Nur-Sultan qalalarynda. Erekshe qajettiligi bar balalarǵa memlekettik bilim berý tapsyrysyn ornalastyrý tetigin qolǵa alamyz. Orta bilimde oqý júktemesin azaıtý máselesi qaralady. Úlgilik oqý baǵdarlamalary jańartylady», dedi mınıstr.
Sonymen qatar ol Prezıdent tapsyrmasyna sáıkes, matematıka, tilder jáne ınformatıka pánderine erekshe nazar aýdarylatyndyǵyn aıtty. «Jáne de Qazaqstan tarıhy men dúnıejúzi tarıhy boıynsha biryńǵaı oqýlyqtardy ázirleý jáne engizý úshin tıisti jumystardy bastadyq», -dedi A. Aımaǵambetov.