Atyraýda 3 jasar qyzymen birge joǵalyp ketken 25 jastaǵy kelinshek bir kúnnen soń tabyldy, dep habarlaıdy Egemen.kz
Qurmanǵazy aýdanynda turatyn 25 jastaǵy kelinshek Atyraý qalasyna taksımen kelgen eken. Ol 30 qańtarda «О́rken-1» shaǵyn aýdanynan shyǵyp, «Vokzal mańy» shaǵyn aýdanyna barmaq bolǵan. Qasyna 3 jastaǵy qyzyn ertken. Alaıda týystary onyń qyzymen birge joǵalǵany týraly polısııaǵa habar beripti.
«Týystarynan túsken shaǵymǵa baılanysty joǵalǵan kelinshek pen qyzyn izdestirý is-sharasy qolǵa alyndy. Atyraý qalalyq polısııa basqarmasy Jedel basqarý ortalyǵynyń qyzmetkerleri oblys ortalyǵynyń shaǵyn aýdandaryndaǵy kóshe oramdarynda ornatylǵan beınekameralarmen baqylaý júrgizdi. Sonyń nátıjesinde 31 qańtarda keshki saǵat 22:05 shamasynda «Almagúl» shaǵyn aýdanynda ornalasqan №6 úıdiń mańynan izdestirý jarııalanǵan azamatsha men onyń qyzy tabyldy», dep habarlady oblystyq polısııa departamentiniń baspasóz qyzmetinen.