Elordanyń bas sanıtarlyq dárigeri Sarhat Beısenovanyń karantın jónindegi jańa qaýlysy shyqty, dep habarlaıdy Egemen.kz Nur-Sultan ákimdiginiń resmı saıtyna silteme jasap.
Jańa qaýly talaptaryna sáıkes, oıyn-saýyq, sporttyq jáne basqa da buqaralyq is-sharalardy, sondaı-aq otbasylyq, eske alý is-sharalaryn, onyń ishinde úıde (banketter, úılený toılary, mereıtoılar, eske alý), mıtıngiler, sherýler, jıyndar jáne t. b. ótkizýge tyıym salynǵan.
Mindetti túrde 2 metrden kem emes áleýmettik qashyqtyqty saqtaı otyryp, jeke tártippen jáne 5 adamnan aspaıtyn toppen tek ashyq aýada sporttyq jattyǵýlar ótkizýge ruqsat. Bir otbasy múshelerinen nemese 3 adamnan aspaıtyn toptardan basqa, tabıǵatqa ekskýrsııalyq, korporatıvtik, toptyq shyǵýlardy uıymdastyrýǵa jáne qalanyń kórikti jerlerine sholý jasaýǵa tyıym salynady.
Qyzmeti jańartylmaǵan obektilerge: bılıard, karaoke, boýlıng-ortalyqtarǵa, batýttar, kompıýterlik klýbtarǵa, túngi klýbtarǵa, býkmekerlik keńseler men oıyn klýbtaryna, onyń ishinde lotereıa utystaryna, jabyq ǵımarattardaǵy oıyn alańdary men attraksıondarǵa, sporttyq obektilerde ornalasqandardy qospaǵanda, onyń ishinde muzdy jáne rolıkti syrǵanaqtarǵa barýǵa tyıym salynady.
65 jastan asqan adamdardyń qala jáne qoǵamdyq oryndar boıynsha júrip-turýy shekteledi. Qoǵamdyq oryndarǵa, onyń ishinde qalalyq qoǵamdyq kólikterge, qyzmetine ruqsat etilgen obektilerge barǵan kezde, sondaı-aq qoǵamdyq oryndarda ashyq aýada bolǵan kezde (ashyq aýada sportpen shuǵyldaný kezinde jáne 5 jasqa deıingi balalardy qospaǵanda) betperde kııý, qashyqtyqty saqtaý jáne antıseptıkterdi paıdalaný jónindegi talaptardy qatań saqtaý kerek.