Qazaqstan Elshiligi onlaın-platformada halal ónimderimen saýda jasaý salasynda QR Saýda jáne ıntegrasııa mınıstrligi men malaızııalyq «Aladdin» kompanııasynyń qatysýymen beınekonferensııa uıymdastyrdy, dep habarlaıdy Egemen.kz.
Is-sharaǵa Elshi Bolat Imanbaev, Saýda jáne ıntegrasııa vıse-mınıstri Ásel Janasova, «QazTrade» saýda saıasatyn damytý ortalyǵy» AQ marketıng jáne elektrondyq kommersııa departamentiniń dırektory О́jet Shegirbaev, «Aladdin» kompanııasynyń negizin qalaýshy jáne basshysy Desmond To jáne t.b. qatysty.
Kezdesý barysynda taraptar elektrondy saýda, «Aladdin» platformasyndaǵy halal ónimderiniń saýdasy, qazaqstandyq kompanııalardyń Ońtústik-Shyǵys Azııa (OShA) naryǵyna jáne malaızııalyq kompanııalardyń Ortalyq Azııa jáne Eýrazııalyq ekonomıkalyq odaq naryqtaryna shyǵý salasyndaǵy ózara árekettesý múmkindikterin talqylady. Kompanııa basshylyǵy elektrondy saýda jáne halal ındýstrııasy salasyndaǵy OShA naryǵy týraly, «Aladdin»-niń jumysy, platformadaǵy saýda-sattyq qaǵıdattary jáne tirkelý týraly tolyq aqparat berdi.
Beınekonferensııa nátıjesinde taraptar arasynda ózara tıimdi yntymaqtastyqty damytý, atap aıtqanda, óz taýarlaryn OShA naryqtaryna shyǵarý úshin qazaqstandyq kompanııalardyń tizimin pysyqtaý, «Aladdin» kompanııasyn «Astana» halyqaralyq qarjy ortalyǵynyń negizinde tirkeý týraly jáne QR Saýda jáne ıntegrasııa mınıstrligimen yntymaqtastyq týraly memorandýmǵa qol qoıý boıynsha kelisimderge qol jetkizildi.