Byltyr qysta áleýmettik jeli arqyly Qyzylorda qalasynda aıaq astynan bir turǵynnyń habarsyz ketkeni jaıly aqparat tarady. Ekinshi aqpan kúni tań alageýimde ádettegideı darııa jaǵasyna júgirýge shyqqan 72 jastaǵy kásipkerdi sodan keıin eshkim kórmegen. Polıseıler málimetindegi kezekti bir oqıǵa sanalatyn osy jaǵdaıǵa eń aldymen eriktiler nazar aýdardy, jurtshylyqtan járdem surady. Jastar toby quqyq qorǵaýshylarǵa kómektesip, aıǵa jýyq ýaqyt darııa boıyn súzip shyqty, qalaǵa jaqyn saıajaılar aýmaǵyn aralady. Biraq habarsyz ketken kásipker sol kúıi tabylmady. Jalpy, azamattardyń iz-túzsiz ketýiniń basty sebebi qandaı? Aıdyń-kúnniń amanynda otbasynan, ortasynan ajyrap qalatyndar nege kóp?
Polıseılerdiń aıtýynsha, bul máseleniń túbi taldyń tamyryndaı taramdalyp jatyr. Mysaly, qazir ákeniń zekigenin, shesheniń urysqanyn kótere almaǵan bala birden dalaǵa bezetin bolǵan. Bir-birimen kelispeı qalǵan erli-zaıyptylar da kóbine osy joldy tańdap jatady. Shańyraqta kún saıyn qaıtalanatyn urys-keristen qajyǵan jasóspirim de ózdiginen ómir súrmekke umtylyp, úıde joq jylýdy syrttan izdeıdi. Bireýge qaryz bolyp, sony óteý úshin ózge aımaqqa baryp jumysqa jaldanatyndar da bar. Basqa qalada oqyp júrgen balasy habarsyz qalsa da, áke-sheshesi eń aldymen osy ishki ister organyna taban tireıtini belgili.
Qandaı jaǵdaı bolsa da polıseıler iz-túzsiz ketkenderdi izdeıdi. Izi shyqty degen habar estilse, ózge óńirge issaparǵa shyǵady, keıde sol jaqtaǵy áriptesterine qolqa salatyn kezderi de bar. Áıteýir, qalaı bolǵanda da joǵaldy degenderdiń bir deregin anyqtap, otbasyna oralýyna múmkindik jasaıdy.
– Habar-osharsyz ketkenderdi izdeý 10 jyldan keıin toqtatylady. Joǵalǵandardyń bir deregi osy ýaqyt ishinde anyqtalyp jatady. Ol merzim ótkennen keıin tabylǵandar ázirshe joq. Taǵy bir aıta keterligi, ózge memleket aýmaǵynan izi shyqqandar kezdesken joq, iz-túzsiz ketkender arasynda elimizdiń basqa óńirinen tabylyp jatqandar bar, – deıdi oblystyq polısııa departamenti bastyǵynyń birinshi orynbasary Shamshıddın Ámıtov.
Aıtpaqshy, áńgimemizdiń basy kásipkerdiń joǵalýynan bastalǵan edi ǵoı. О́tken jyly aqpan aıynyń ekisinde 1948 jyly týǵan sol azamattyń habarsyz ketýine baılanysty qalalyq polısııa bólimi izdeý salǵan, Qylmystyq kodekstiń 99-baby 1-bóligi negizinde bir deregin anyqtaý baǵytyndaǵy jumystar áli jalǵasyp jatyr eken.
Byltyrǵy jyl sońynda jurtshylyq áleýmettik jeli arqyly oblys ortalyǵynda 32 jastaǵy kelinshektiń joǵalǵanynan habardar bolǵan edi. Týystarynyń aıtýynsha, habarsyz keterden bes aıdaı buryn úshinshi balasyn bosanǵan kelinshektiń aıaq astynan minezi tuıyqtalyp, kúızeliske túsipti. Úndemegen kúıi uıaly telefonyn úıde qaldyryp, kóshege shyǵyp júre bergen. Halyq kóp shoǵyrlanatyn jerlerge, marshrýtty kólikterge sýreti ilinip, respýblıkalyq telearnalardan kórsetildi. Joǵalǵanyna eki aıdan asyp bara jatqan otyz segiz jastaǵy kelinshekti izdeý bir sátke de toqtaǵan emes.
Habarsyz ketkenderdi izdeýge erikti jastardyń járdemi kóp bolyp otyr. Qarapaıym turǵyndardan alynǵan málimet boıynsha da anyqtalyp jatqandar az emes. Polıseılerge áleýmettik jeli qoldanýshylarynyń kómegi tıetin de kezi bolady.
Osydan 2 jyl buryn oblysta 130, byltyr 118 adam izdestirilipti. Kóbiniń deregi kóp uzamaı-aq anyqtalǵan. Qazir oblys polıseıleri habar-osharsyz ketken 48 turǵyndy izdestirý ústinde.
Keıde qarbalas tirliktiń jan-jaǵyńa moıyn burǵyzbaı, kóp kóriniske kóz toqtatyp qaraýǵa mursha bermeıtini bar. Aıaldamada ilingen habarsyz ketkenderdiń fotosyna asyǵys kóz júgirtip, kóshedegi kezbelerdiń qasynan tezirek sytylyp ketkimiz kelip turatyny da bar.
Bir sát toqtap, aınalańyzǵa kóz salyńyzshy. Joǵalǵan jaqynynan kúder úzbeı, keler dep kútken janǵa sizdiń de kómegińiz tıip qalar. Bári múmkin, óıtkeni bul ómir ǵoı...
Qyzylorda