Qalany dári-dármekpen jabdyqtaýdy qamtamasyz etý maqsatynda Almaty qalasynyń stasıonarlarynda, emhanalary men dárihanalarynda dári-dármek quraldarynyń jáne medısınalyq maqsattaǵy buıymdarynyń jetkilikti bolýyna apta saıyn monıtorıng júrgizilip turady, dep habarlaıdy Egemen.kz.
Búgingi kúni, koronavırýs ınfeksııasyn emdeýdi talap etetin preparattar qalanyń barlyq dárihanalarynda bar. Qamtamasyzdyq shamamen 90%-dy quraıdy, dárihana qoımalarynda 1 mln.-nan astam (1 037 myń) emdeýdi talap etetin preparattar bar.
«Dári-dármek quraldaryn satýdan alyp tastaý týraly eshqandaı nusqaý bolǵan joq jáne bolýy múmkin emes, sebebi dárihanalar bıznestiń táýelsiz sýbektileri bolyp tabylady. Budan basqa, qala ákimdigi dárihana sórelerin áleýmettik mańyzy bar dári-dármek quraldarymen jáne medısınalyq maqsattaǵy buıymdarmen tolyqtyrý boıynsha barlyq qajetti sharalardy qoldanýda», – dep habarlady Almaty qalasy Kásipkerlik jáne ınvestısııalar basqarmasynyń basshysy Erkebulan Orazalın.
Basshynyń aıtýynsha, naryqty tolyqtyrý úshin qala dárihanalaryna dári-dármek preparattaryn jetkizý Turaqtandyrý qory qarajattarynyń esebinen júzege asyrylady. Qazirgi ýaqytta, ákelýge josparlanǵan 40,1 mln. dári-dármek quraldary men medısınalyq maqsattaǵy buıymdardyń qalaǵa jetkizilgeni 47,2 mln (118%), 23,4 mln satyldy, qoldaǵy bary 23,8 mln onyń ishinde, azaıtylmaıtyn qaldyǵy 8 mln.
Osylaısha, qalada nyqtylyqtyń eki aılyq qory qalyptastyryldy.
Sonymen birge, farmaqaýymdastyǵynyń derekteri boıynsha elimizde kovıdke qarsy birqatar preparattarǵa shekti baǵalardyń engizilýine baılanysty, dárihanalar dári-dármek quraldaryna qaıta baǵalaý jumysyn júrgizýdi jalǵastyrýda, bul olardyń sórelerde ýaqytsha bolmaýyna ákelip soǵýy múmkin.
Jalpy alǵanda, Almatyda dári-dármekke, sondaı-aq medısınalyq betperdelerge kóp suranys joq. Jaǵdaı turaqty.