Almatyda pandemııa jaǵdaıynda qala ákimi Baqytjan Saǵyntaevtyń tapsyrmasy boıynsha COVID-19-ben aýyratyn adamdar arasyndaǵy ólimdi azaıtý boıynsha sharalar qabyldandy, dep habarlaıdy Egemen.kz
Qysqa merzimde ınfeksııalyq bólimshelerdiń, onyń ishinde ınfeksııalyq emes klınıkalar bazasynda jumys uıymdastyryldy. Olarda 250 tósek-orynǵa arnalǵan reanımasııalyq bólimsheler ashylǵan. Infeksııalyq aýrýlar retinde anyqtalǵan stasıonarlarda reanımasııalyq naýqastarǵa arnalǵan 100 tósek bar. Pandemııanyń órshigen kezinde osy stasıonarlardyń reanımasııalyq bólimshelerinde kún saıyn 160 aýyr naýqas boldy – bul dárigerler men qalanyń densaýlyq saqtaý júıesine úlken júkteme.
Buryn-sońdy bolmaǵan sharalardyń arasynda – Anestezıologııa jáne reanımatologııa ortalyǵyn qurý boldy. Ortalyq aýyr naýqastardy tıimdi emdeý úshin barlyq stasıonarlardyń jumysyn úılestire bastady. Ortalyqtyń quramyna osy saladaǵy qalanyń úzdik mamandary kirdi. Ortalyqty «A.N.Syzǵanov atyndaǵy ulttyq ǵylymı hırýrgııa ortalyǵy» AQ reanımatologııa bóliminiń meńgerýshisi Tileýberdi Qýandyqov basqarady.
Ortalyqtyń basty mindeti - koronavırýstyq ınfeksııasy bar reanımasııalyq naýqastarǵa qarqyndy terapııa júrgizetin dárigerlerge keńes berý, ádistemelik jáne praktıkalyq kómek kórsetý bolyp tabylady.
Osy ortalyqtyń mamandary kún saıyn ınfeksııalyq stasıonarlarǵa, gospıtaldarǵa shyǵady jáne jergilikti jerlerdegi reanımatologtarǵa kómek kórsetedi. Tek 2020 jyldyń ózinde mamandar brıgadasy 2 000-nan astam shaqyrtý boıynsha qyzmet kórsetti, aýyr naýqastardyń 5 000-nan astam konsýltasııasy, beınebaılanys arqyly «oqıǵa ornynda» 100-ge jýyq konsılıýmdardy júzege asyrdy.
Qala ákiminiń baspasóz qyzmeti taratqan aqparatqa sáıkes, jyl basynan beri ortalyqta kelesideı jumystar júrgizildi:
praktıkalyq kómek kórsetý úshin mamandar tobynyń klınıkalarǵa barýy - 533;oqıǵa ornynda konsýltasııa júrgizý - 2248;
aralaý nátıjeleri boıynsha Ortalyq basshysymen naýqastar jaıly beınebaılanys rejiminde talqylaý - 38;
Ortalyq basshysymen “oqıǵa ornyna” barý arqyly konsılıýmdar ótkizý - 12;
professorlarmen qashyqtyqtan onlaın-konsılıýmdar ótkizý - 23.
Ortalyqtyń jumysy KVI men pnevmonııadan bolatyn ólimdi kúrt tómendetýge múmkindik berdi. Búgingi tańda ólim-jitim eń tómengi deńgeıde.
«Eger buryn salystyrmaly túrde pnevmonııamen aýyratyn «reanımasııalyq» naýqastardyń kóbi jastar bolsa, búginde KVI-men reanımasııaǵa túsetin naýqastar - 60 jastan asqan jáne júrek jetkiliksizdigi, qant dıabeti, baýyr sırrozy, onkologııa, revmatızm, SPID, búırek jetkiliksizdigi, ınsýlt jáne t. b. sozylmaly aýrýlary qatar júretin naýqastar. Sonymen qatar, pasıentterdiń jartysynan kóbi ózin-ózi emdeýmen aınalysyp, úıden tikeleı aýyr jaǵdaıda keledi. Basqalary dárigerge múlde júginbegen», dep atap ótti ortalyq mamandary.
Osyǵan baılanysty medısına mamandary qala turǵyndaryn KVI juqtyrýdan saqtaný úshin karantındik nusqamalardy saqtaýǵa jáne vırýstyq ınfeksııa belgileri paıda bolǵan jaǵdaıda dereý bilikti medısınalyq kómekke júginýge shaqyrady.
Qazaqstanda koronavırýstyq ınfeksııanyń 196 myń jaǵdaıy tirkelgen, onyń 2,5 myńnan astamy ólimmen aıaqtalǵan. Almatyda pandemııa bastalǵannan beri COVID-19-dyń 22,8 myńnan astam jaǵdaıy tirkeldi.