О́tken jyldyń sońynda S.О́tebaev atyndaǵy Atyraý munaı jáne gaz ýnıversıtetinde «Total energy school» mektebi ashyldy. Endi munda Fransııanyń jetekshi professorlary atyraýlyq stýdentter men jas ǵalymdarǵa dáris beredi. Maqsat – tájirıbeli halyqaralyq sarapshylardyń teorııalyq bilimi men praktıkalyq daǵdysyn úırený, munaı ónerkásibi, akademııalyq oralymdylyq turǵysynda baılanys ornatý.
– Qazir joǵary bilimdi mamandarǵa qoıylatyn talap kúsheıdi. Ásirese qaıta daıarlaý máselesi, jańa tehnologııalardy meńgerý mańyzdy bolyp otyr. «Total energy school» mektebi uıymdastyratyn kýrstar osy máselelerdi sheshýge septigin tıgizedi. Buǵan deıin Nazarbaev Ýnıversıteti men ál-Farabı atyndaǵy QazUÝ-de ótken kýrstar tıimdiligin kórsetti. S.О́tebaev atyndaǵy Atyraý munaı jáne gaz ýnıversıtetinde eki aptada 350 adam osy kýrsqa qatysyp, bilimin jetildiredi. Bul jastardyń ǵylym-bilimge degen qulshynysyn arttyryp, bolashaǵyna senim men serpin beredi, – dedi Energetıka mınıstri Nurlan Noǵaev.
Ýnıversıtet rektory Gúlzada Shakýlıkovanyń aıtýynsha, tómen kómirtekti energetıka salasynyń kóshbasshysy atanyp otyrǵan «Total energy school» álemdegi eń úzdik energetıkalyq kompanııalardyń jumysyn tek teorııalyq turǵyda emes, is júzinde zertteýge múmkindik berip otyr. «Total» professorlar qaýymdastyǵy bakalavrıat pen magıstratýrada bilim alatyn stýdentterge, professor-oqytýshylar quramyna munaı-gaz, munaı-hımııa, energetıka jáne qorshaǵan orta pánderinen kýrstar uıymdastyrady.
– Bul tájirıbe stýdentterdiń bolashaqta jumysqa ornalasýyna dańǵyl jol ashady. Dáristerdi «Total» mamandary kásibı saraptama men naqty is-tájirıbedegi mysaldardy zerdeleý negizinde daıyndap otyr. Biz yntymaqtastyqty tek munaı-gaz sektorynda ǵana emes, bolashaǵy zor jańǵyrmaly energııa kózderi salasynda da jalǵastyrýǵa, birlesken jobalardy damytýǵa nıettimiz, – dedi Gúlzada Shakýlıkova.
Jaqynda atalǵan ýnıversıtette belsendi transformasııalaý aıasynda bilim berý prosesine taǵy bir úzdik tájirıbe engizildi. Bul joly energetıka sektoryn kásibı mamandarmen qamtý úshin MVA baǵdarlamasy ashyldy. Rektor Gúlzada Shakýlıkovanyń pikirinshe, bul baǵdarlama tek óńirdiń ǵana emes, elimizdiń ındýstrııasyna ulttyq kadrlardy daıarlaýǵa yqpal etedi. О́ıtkeni kóshbasshy mamandy tek úzdiksiz kásibı jáne jeke damý ǵana ereksheleıdi. Sol sebepten MVA baǵdarlamasy mansabyn odan ári joǵarylatýdy, sondaı-aq qoǵamnyń damýyna úlesin qosýdy kózdeıtin kóshbasshylarǵa arnalyp otyr.
– Kez kelgen memlekettiń damýynyń negizi – bilim men ǵylymdy jetildirý. Buǵan bizdiń ýnıversıtettegi MVA baǵdarlamasynyń qosar úlesi zor bolmaq. Munda dáris beretin qazaqstandyq jáne sheteldik iri kompanııalardyń tájirıbeli oqytýshylary men tanymal sarapshylary modýldik nysandaǵy jumystan qol úzbeı oqytýdy, sheteldik taǵylymdamany, kommýnıkasııalyq múmkindikti keńeıtýdi kózdeıdi, – dedi G.Shakýlıkova.
Atyraý oblysy