Úndistannyń soltústiginde Gımalaıdaǵy muzdyq qulap, saldarynan 171 adam habar-osharsyz joǵaldy, 26 adam qaza tapty, dep habarlaıdy Egemen.kz
Muzdyq Dhaýlıgangı ózeniniń arnasyna qulap, úlken sý tasqynyn týdyrǵan. Bul oqıǵa Úndistannyń soltústik Ýttarakhand shtatyndaǵy Chamolı okrýginde oryn alǵan. Saldarynan 171 adam joǵalyp, 26 adam qaıtys boldy. Habar-osharsyz ketkenderdiń kópshiligi eki sý elektr stansasyn salýmen aınalysqan jumysshylar bolǵan degen málimet bar.
Qutqarý jáne izdestirý jumysy júrip jatyr. Jyldam sý aǵyny men taý jynystary taýdan shyqqan kezde salynyp jatqan taǵy bir shaǵyn gıdrostansany qıratty. Qaıǵyly oqıǵa saldarynan turǵyn úıler qırap, aǵashtar syndy. Ýttarakhand shtatynyń polısııa bastyǵy Ashok Kýmar CNN jýrnalısterimen sóılesken kezde 26 adamnyń denesi qırandylar astynan shyǵarylǵanyn aıtty. Onyń aıtýynsha, 171 adamdy izdeý jumysy jalǵasýda, onyń ishinde gıdrostansalardyń biriniń qurylysy kezinde salynǵan týnnelde qalǵan 35 jumysshy bar.
Týnnelden jumysshylardy izdeý jáne shyǵarý boıynsha qutqarý jumysyna qırandylar kedergi keltirip, ony baıaýlatady. О́tken jeksenbide qutqarýshylar kishkentaı týnnelden 12 adamdy shyǵaryp aldy. Oqıǵa saldarynan 13 aýyldyń 2500 turǵyny elektr jaryǵynsyz qaldy.
Eske sala ketsek, budan buryn Úndistannyń taýly aımaǵyndaǵy Ýttarakhand shtatynda muz kóshkini saldarynan ózen sýy tasyp, tabıǵat apatynan 150-ge jýyq adamnyń iz-túzsiz ketkenin habarlaǵan bolatynbyz.
Keıinirek Úndistan Premer-mınıstri Narendra Modı Ýttarakhand shtatyndaǵy muz kóshkini saldarynan týyndaǵan sý tasqynynyń baqylaýǵa alynǵanyn málimdedi.