Attary ańyzǵa aınalǵan kezindegi kásipqoı bokstyń has sheberleri – Maık Taıson men Evander Holıfıld bıylǵy jyldyń jaz nemese kúz aılarynda qaıta judyryqtasýy múmkin, dep habarlaıdy Egemen.kz.
Aıtýly qos azamatynyń ekeýi de sporttyq mansaptaryn áldeqashan aıaqtaǵan. Soǵan qaramastan jankúıerler qos sańlaqtyń jekpe-jegin taǵatsyzdana kútýde. Árıne, oǵan tańdanýǵa bolmaıdy. Sebebi, olar óz dáýiriniń teńdessiz tulǵalary edi.
Máselen, 54 jastaǵy Maık Taısonnyń esimi asa aýyr salmaqtaǵy eń jas álem chempıony retinde tarıhta qaldy. Bul ataqqa ol nebary 20 jasynda qol jetkizdi. 1985-2005 jyldar aralyǵynda AQSh-tyń alyby 58 kezdesý ótkizip, 50 ret jeńiske jetti. 44 qarsylasyn esinen tandyrdy. Alty ret utylyp, taǵy eki básekeniń nátıjesi esepke alynbady.
Al 58 jastaǵy Evander Holıfıld 1984-2011 jyldar aralyǵynda atoı saldy. 57 ret rıngke kóterilgen ol 44 márte ústemdik tanytty. 29 jekpe-jekti merziminen buryn aıaqtady. 10 márte utylyp, eki ret teń tústi. Taǵy bir básekeniń nátıjesi tirkelgen joq.
Aıtýly qos myqtynyń joly 1996 jáne 1997 jyldary eki márte qıysty. Alǵashqysynda Holıfıld aıqyn jeńiske qol jetkizse, ekinshisinde qarsylasynyń qulaǵyn tistegeni úshin Taıson jarystan shettetildi. Eger úshinshi márte judyryqtasatyn bolsa, onda olar 200 mıllıon fýnt sterlıng kóleminde syıaqy alady.