26 jastaǵy qazaqstandyq tennısshi Iýlııa Pýtınseva keshe Melbýrnde ótip jatqan «Úlken dýylǵa» sanatyndaǵy jarystyń biri – Aýstralııanyń ashyq birinshiliginiń úshinshi aınalymyna shyqty.
Tusaýkeser kezdesýinde kezinde AQSh-tyń ashyq birinshiligin utyp, Rolan Garrostyń fınalynda oınaǵan amerıkalyq Sloan Stıvenske san soqtyrǵan jerlesimiz ekinshi kezeńde qazirgi kezde WTA reıtınginde 67 orynda turǵan Alıson Van Eıtvankpen sheberlik baıqasty. 26 jastaǵy Belgııanyń ókiliniń eń úzdik nátıjesi – 2015 jyly Rolan Garrostyń shırek fınalyna deıin jetýi. Osy kúnge deıin qos tennısshi bir-birimen úsh márte kezdesip, úsheýinde de Pýtınseva jeńiske jetti. Bul joly da otandasymyz óziniń myqtylyǵyn moıyndatty. 1 saǵat 56 mınýtqa sozylǵan bul básekede 6:4, 1:6, 6:2 esebi tirkeldi. Endi Iýlııa amerıkalyq Korı Gaýff pen ýkraınalyq Elına Svıtolına arasyndaǵy matchtyń jeńimpazymen kúsh synasady.
Al búgin Zarına Dıas kortqa shyǵady. Onyń úshinshi kezeńdegi qarsylasy – álemniń 32 raketkasy Garbıne Mýgýrýsa. Ispanııa tennısshisi kezinde WTA reıtınginde kósh bastap, Ýımbldon men Rolan Garrosta top jarǵan.