Mádenıet jáne sport mınıstrligi 2021 jyldy «Qazaqstandaǵy balalar men jasóspirimderdiń kitap oqýyn qoldaý jyly» dep jarııalady. Bul týraly Ortalyq kommýnıkasııalar qyzmetinde ótken brıfıngte Qazaqstan Respýblıkasy Mádenıet jáne sport vıse-mınıstri Nurǵısa Dáýeshov málimdedi, dep habarlaıdy Egemen.kz.
«Bıyl alýan túrli mádenı-tanymdyq, oqytý sharalaryn ótkizý josparlanǵan. Sonyń ishinde, kitaphanalar júıesi men qyzmetiniń zamanaýı úlgilerin uıymdastyrý isi jolǵa qoıylýda. Balalar men jasóspirimderdiń kitap oqýyn qoldaý jyly aıasynda ótetin sharalarmen respýblıkanyń barlyq aımaqtary qamtylady. Oqyrmandardyń kitap oqýyna barynsha jaǵdaı jasalady», - dedi vıse-mınıstr.
Mysaly, Almaty qalasynda, Mańǵystaý, Shyǵys Qazaqstan oblystary aýmaǵynda jańa kovorkıng ortalyqtaryn ashý josparlanǵan. Bul jastardy, balalardy, jasóspirimderdi kitaphanaǵa tartý maqsatynda jasalýda. Mınıstrliktiń málimetinshe, búginde kovorkıngtardyń jumysy 2,5 esege artty. Elimizde 401 kovorkıng ortalyqtary jumys isteýde.
Budan basqa aǵymdaǵy jyly elimizdiń astanasy Nur-Sultan qalasynda Balalar men jasóspirimderge arnalǵan respýblıkalyq kitaphanany ashý máselesi zańnamalyq jáne qarjylyq turǵyda pysyqtalatyn bolady.