Búginde Shymkentte jumyspen qamtý jáne áleýmettik qorǵaý basqarmasy tarapynan qaladaǵy múmkindigi shekteýli jandar úshin kedergisiz orta qalyptastyrýda tıisti sharalar atqarylyp jatyr. Múgedektigi bar azamattardyń belsendi ómir súrý saltyn qalyptastyrý maqsatynda ınvataksı, áleýmettik taksı qyzmetteri uıymdastyrylǵan.
Invataksı qyzmetine qolarbaǵa tańylǵan múmkindigi shekteýli azamattar júgine alady. Bekitilgen 18 avtokólik arnaıy jyljymaly qurylǵymen jáne kreslo-arbalardy ornatýǵa arnalǵan quraldarmen jabdyqtalǵan. Arnaıy kóliktermen azamattar jumys ornyna, oqý ornyna, quqyq qorǵaý organdaryna, áleýmettik, medısınalyq mekemelerge qatynaı alady.
Onymen qosa, bul kóliktermen múgedekter áýejaılarǵa, temir jol vokzaldary men avtovokzaldarǵa da bara alady. Byltyr 500-den astam múmkindigi shekteýli azamattan jıyrma segiz myńǵa jýyq ótinimge tapsyrys berilip, qyzmet kórsetildi. Qazirgi tańda 300 múmkindigi shekteýli azamattan ótinish qabyldandy.
Al áleýmettik taksı qyzmetine júrip-turýy qıyn birinshi, ekinshi top múgedekteri men 16 jasqa deıingi múmkindigi shekteýli balalar paıdalana alady. Byltyrdan beri olarǵa 43 kólik qyzmet kórsetýde. Aldyńǵy jyly 500-den astam múmkindigi shekteýli azamattan 125 137 ótinimge tapsyrys berilgen. Bul jyly 332 múmkindigi shekteýli azamat basqarmaǵa osy qyzmetti alý úshin ótinish bergen.