Qazaqstandyqtar 2021 jyldyń qańtar aıynda 8333 jańa avtokólik satyp alǵan. Sonyń ishinde jeńil kólik, júk kóligi jáne avtobýstar bar. Bul 2020 jyldyń qańtarymen salystyrǵanda 54 paıyzǵa artyq kórsetkish, dep habarlaıdy Egemen.kz
Qazaqstan AvtoBıznes qaýymdastyǵynyń dereginshe, jyldyń alǵashqy aıynda resmı dılerler 7771 jeńil kólik pen jeńil kommersııalyq tehnıka, sondaı-aq 562 júk kóligi, arnaıy tehnıka jáne avtobýs satqan. Byltyr dál osy ýaqytta 5396 kólik saýdalanypty.
– Ádette jyl basynda saýda kólemi tómen bolady jáne ótken jyldyń jeltoqsanymen salystyrǵanda sıfr áldeqaıda kemshin túsedi. Alaıda 2021 jyldyń qańtaryndaǵy nátıje byltyrǵy qańtardaǵy nátıjeden áldeqaıda asyp tústi. Bıyl óndirýshiler kóptegen jańa transportty naryqqa shyǵarmaq. Tutynýshylardyń kóńilinen shyǵý úshin dılerler de kólik satylymy kezinde usynylatyn qosymsha ónimder de daıyndap otyr, – deıdi qaýymdastyq vıse-prezıdenti Anar Maqasheva.
Brendter ondyǵyn Hyundai (2392) bastap tur. Chevrolet dılerleri 2233 avtokólik satsa, Toyota 1046 satylymmen úshinshi orynda. Odan keıingi oryndarda Lada (575), Kia (332), Nissan (249), Renault (200), Volkswagen (148), JAC (113) jáne Lexus (99) avtokólikteri ornalasqan.
Modelder boıynsha kópshilik negizinen Chevrolet Cobalt, Chevrolet Nexia, Hyundai Accent, Hyundai Tucson, Hyundai Creta, Toyota Camry, KiaRio, Toyota Rav4, Lada Vesta, Toyota LC Prado kólikterine erekshe qyzyǵýshylyq tanytqan.