2021 jylǵy 11 aqpan kúni Qyzylorda oblysy boıynsha Qylmystyq-atqarý júıesi departamenti qyzmetkerleri muqtaj jandar úshin qan tapsyryp, qaıyrymdy ister qataryn tolyqtyrdy, dep habarlaıdy Egemen.kz
Departamenttiń 10 shaqty qyzmetkeri donorlyq qanǵa muqtaj jandarǵa kómektesip, ómirlerin qutqarýdy maqsat etip Qyzylorda qalasyndaǵy oblystyq qan tapsyrý ortalyǵyna keldi.
Bastamas buryn barlyq donorlar medısınalyq tekserýden ótedi. Qarsy kórsetilimder bolmaǵan jaǵdaıda ǵana qan tapsyrýǵa ruqsat etiledi. Ár donordan 450 ml shamasynda qan alady. Barlyq prosedýranyń ózi daıyndyqpen birge 20 mınýtqa jýyq ýaqytty alady.
«Bir donor – bir ómir» dep beker aıtylmasa kerek jáne osy is-áreketimiz bireýdiń anasynyń, ákesiniń, balasy nemese aǵasynyń ómirin qutqaryp qalatynyna senimdimiz jáne barlyq azamattardy osyndaı qaıyrymdy is jasap, kómekke muqtaj jandarǵa kómektesýge shaqyramyz», dedi departament bastyǵynyń orynbasary ádilet polkovnıgi M.Nákenov.
Aıta keterlik jaıt, mundaı aksııa QAJD qyzmetkerleri úshin ıgi dástúrge aınalǵan jáne júıeli túrde ótkizilip turady.