Shymkent qalasynyń ákimi Murat Áıtenov «Meıirim shýaǵy» qorynyń dırektory Asqar Moldabekti qabyldady. Kezdesý barysynda taraptar pandemııa kezinde halyqqa áleýmettik qoldaý kórsetken jomart jandar, dárigerler men tártip saqshylarymen birlesip eńbek etken eriktilerdiń eren eńbekterin atap ótti, dep habarlaıdy Egemen.kz
Osy tusta Asqar Moldabek álemdi jaýlaǵan indet kezinde qor tarapynan birqatar jumystar atqarylǵanyn baıandady.
«Jalpy bizdiń qor balalardy reabılıtasııalyq-túzetý, damytý jumystarymen aınalysady. Búginde tirek-qımyl apparaty buzylǵan 120-130 balaǵa qyzmet kórsetip kelemiz. Budan bólek, elimizde jarııalanǵan tótenshe jaǵdaı kezinde qordyń atynan medısına mekemesine IVL apparattary men turǵyndarǵa dári-dármek, azyq-túlik úlestirildi», dedi qor dırektory.
Qor dırektorynyń aıtýynsha, 2021 jyly qamqorlyqqa alynatyn otbasy sanyn 70 otbasyǵa deıin arttyrý kózdelip otyr. Sonymen qatar, «Jarqyn bolashaq» baǵdarlamasyn bastaý, ár maýsymda «Qaıyrymdylyq konsert» uıymdastyrý, aǵash otyrǵyzý syndy is-sharalardy ótkizý josparlanýda.
Izgilikti iste el azamattarynyń shet qalmaıtynyn aıtqan qala ákimi, bir ǵana Arys pen Maqtaaralda oryn alǵan apattyń saldaryn joıýda bizdiń elimiz judyryqtaı jumylǵanyn, al pandemııa kezinde qoǵam birligin taǵy da kórsetkenin atap ótti.
Qaıyrymdylyq qorlary arqyly turmysy tómen otbasylarǵa kóptegen kómek berilýde. Osy baǵyttaǵy jumystardy uıymdastyryp, azamattarǵa qoldaý kórsetip otyrǵan qor ujymyna qala basshysy alǵysyn aıtty.