Oblystyq jastar festıvaliniń shymyldyǵyn aýdan jastary “EQYU – Qazaqstannyń álemdik abyroıy” degen taqyryppen ashty. Atalǵan kezdesýge Almaty oblysynyń aýdan, qalalarynan aǵa urpaq ókilderi men jastar jınalyp, onyń mazmunyn tolyqtyrdy.
Eýropadaǵy qaýipsizdik jáne yntymaqtastyq uıymyna Azııa jáne TMD memleketteri arasynan tóraǵalyq tizginin tuńǵysh ustaǵan elimizdiń asqaq abyroıy jaıly jastar aldynda sóz sóılegen aýdan ákimi Mahabbat Bıgeldıev árdaıym jastardyń alǵy shepten kórinip, ekonomıkany nyǵaıtýdaǵy irgeli isterin ortaǵa salsa, oblystyq ishki saıasat basqarmasynyń bastyǵy G.Súleımenova bıylǵy oblystyq festıvaldiń osynda ótýi tegin emestigin jetkizdi. Jambyl aýdany batyrlar men aqyndardyń qutty mekeni bolǵandyqtan jyl saıyn óreli isterimen erekshelengenine, memlekettik jastar saıasatyn júzege asyrýda aımaqta aýqymdy jumystar júzege asqanyna toqtaldy.
El tarıhy men Memleket basshysynyń sarabdal saıasatyn arqaý etken alýan taqyryptardy kótergen aýdan jastary ortalyq alańda leg-legimen jalyndy sóz, eljandylyq kózqarasymen jarqyraı kórindi. Jas júrekke ot beretin, elim-jerim dep emirenetin, memleketim dep mereılenetin shuǵylaly sátke jınalǵandar tarapynan qoldaý tapty. On jasar oǵylan, jelkildegen jigit, boı túzegen boıjetkenniń elge, jerge degen shynaıy sezimderi búgingi beıbit ómirdiń baıanyn, keń-baıtaq Qazaqstannyń abyroıyn, týǵan jer topyraǵynyń qasıetin sezinýimen erekshelendi. Asqaq poezııa áýege sharyqtap, kórikti sózder kókeıge quıyldy.
Festıvalda aǵa urpaq ókilderi atynan oblystyq ardagerler keńesiniń tóraǵasy Egeýbek Dalbaǵaev sóılep, jastarǵa bata berdi. Jambyl jastarynyń ortaq tilegin Shoqan Ýálıhanov atyndaǵy orta mekteptiń 11-synyp oqýshysy, Grekııada ótken halyqaralyq olımpıadanyń altyn júldesin ıelengen bilim ozaty Dinmuhamed Ermek jetkizdi. Jıynda aýdan jastarynyń úndeýi qabyldandy. Memlekettik jastar saıasatyn júzege asyrýǵa eleýli úles qosqan aýdan ozattary oblystyq ishki saıasat basqarmasynyń jáne Jambyl aýdany ákiminiń alǵys hattarymen marapattaldy.
Kúmisjan BAIJAN.
Almaty oblysy.