О́kinshke qaraı, tas joldardaǵy jol jamylǵysynyń sapasy jaqsarǵan saıyn jol-kólik oqıǵalarynyń sany da artyp keledi. Rekonstrýksııalanyp jatqan ýchaskelerdegi jol belgilerine qaramastan, júrgizýshiler jol júrý erejelerin buzýda, dep habarlaıdy Egemen.kz Indýstrııa jáne ınfraqurylymdyq damý mınıstrligine silteme jasap.
Kóbine
júrgizýshiler aınalma joldardan jańa jol jamylǵysy bar ýchaskelerge shyqqanda, jyldamdyqty shamadan tys asyryp jatady. Al bul jol apatynyń oryn alýyna ákelip soǵady. Máselen, bıyl 1 qańtardan bastap Almaty, Qaraǵandy, Aqtóbe, Atyraý, Shyǵys Qazaqstan jáne Qostanaı oblystaryndaǵy jańartylyp jatqan jáne jyldamdyqty shekteý belgileri ornatylǵan tas joldarda 14 jol apaty oryn alǵan.
Jol kólik oqıǵalary «Almaty-О́skemen», «Aqtóbe-Atyraý-Astrahan», «Ekaterınbýrg-Almaty», «Almaty-Tashkent-Termez», «Omby-Maıqapshaǵaı», «Qyzylorda-Pavlodar», «Qarabutaq-Komsomolskoe-Denısovka-Qostanaı» avtojoldarynyń rekonstrýksııalanǵan ýchaskelerinde oryn alǵan. Saldarynan 12 adam mert bolyp, 20 adam jaraqat aldy.
QR Indýstrııa jáne ınfraqurylymdyq damý mınıstrliginiń Avtomobıl joldary komıteti kólik ıelerin qarapaıym jol júrý erejelerin saqtap, jol belgilerindegi aqparatty elep-eskerýge shaqyrady.
Aıta ketý kerek, 2021 jyldyń 15 aqpanyndaǵy jaǵdaı boıynsha respýblıkalyq avtomobıl joldarynda 199 JKO oryn alǵan. Saldarynan 75 adam qaza taýyp, 334 adam túrli deńgeıdegi dene jaraqatyn aldy.