SQO-da «Nur Otan» partııasynyń saılaýaldy ýádelerin iske asyrý jónindegi jol kartasy bekitildi. Onda taıaýdaǵy 5 jylǵa josparlanǵan 99 is-sharany qamtylǵan. Ony depýtattarǵa SQO ákiminiń orynbasary Asqar Saqypkereev oblystyq máslıhattaǵy «Nur Otan» depýtattyq fraksııasynyń otyrysynda tanystyrdy.
Otyrys jumysyna «Nur Otan» partııasy óńirlik fılıalynyń tóraǵasy, SQO ákimi Qumar Aqsaqalov qatysty. Barlyq is-sharalar saılaýaldy baǵdarlamanyń 7 baǵyty boıynsha josparlanǵan. Olar – «Ekonomıkalyq turaqty óńir», «Jaıly óńir», «Áleýmettik-baǵyttalǵan óńir» jáne t.b. Jol kartasyn iske asyrý nátıjelerine qol jetkizý úshin bıýdjetten 435,4 mlrd. teńge jáne 475,1 mlrd. teńge jeke ınvestısııalar mólsherinde qarajat tartý kózdelgen. «5 jyl ishinde 70,2 mlrd. teńgege jergilikti mańyzy bar 2,7 myń km joldy rekonstrýksııalaý jáne jóndeý júrgiziledi, bul sapaly joldardyń úlesin 69%-n 98%-ǵa deıin arttyrýǵa múmkindik beredi. Oblystyń 142 aýylynda sýmen jabdyqtaý obektilerin salý jáne rekonstrýksııalaý josparlanǵan. Bul maqsattarǵa shamamen 71 mlrd. teńge tartý kózdeletin bolady. Qurylysta biz jalpy aýdany 1,9 mln. sharshy metrden asatyn kóp páterli turǵyn úılerdi iske qosý esebinen bir turǵynǵa shaqqanda turǵyn úımen qamtamasyz etilý kórsetkishiniń 22,3-ten 25,5 sharshy metrge deıin ulǵaıýyn kútemiz», - dedi Asqar Saqypkereev.
Fraksııa otyrysynda «Nur Otan» partııasy óńirlik fılıalynyń tóraǵasy Qumar Aqsaqalov sóılep, «Jol kartasyna halyqqa bergen ýádelerdi tolyq ári sapaly oryndaý jónindegi barlyq qajetti sharalar endi. Endigi mindet, osy jumystyń ýaqytynda oryndalýyn, bólingen qarjynyń maqsatty jumsalýyn baqylaý. Al barlyq sharany sapaly iske asyrý halyqtyń ómir súrý sapasy men ál-aýqatyn arttyrýǵa múmkindik beredi», dedi.