Medısınalyq bilimi bar azamattar endi memlekettik medısınalyq mekemelerge aqparattyq júıe arqyly jumysqa qabyldanatyn bolady, dep habarlaıdy Egemen.kz qala ákimdiginiń baspasóz qyzmetine silteme jasap.
Bul úshin kadrlardy irikteýdiń avtomattandyrylǵan «Nr-process» júıesi iske qosylmaq. Buǵan deıin bul júıe qaladaǵy bilim salasyna endirilip, búgingi kúnge deıin 300-den pedagog jumysqa ornalasqan bolatyn.
Mamandardy jumysqa irikteıtin aqparattyq júıeni iske asyrý úshin Shymkent qalasynyń densaýlyq saqtaý basqarmasy men «HR-process» kompanııasy arasynda kelisim shart túzildi. Kelisim negizinde 2021 jyldyń sáýir aıynan bastap jańa júıe iske qosylyp, jumys izdeýshi azamattar aqparattyq portal arqyly jumysqa qybyldanady. Kadrlardy irikteýdiń ashyq jáne obektıvti júıesi – densaýlyq salasyna úzdik mamandardy tartýdyń kepili bolady.
Jańa júıe arqyly jumys izdegen medısına bilimi bar mamandar bas dáriger nemese kadr bólimine barmaı-aq arnaıy baǵdarlama arqyly jumysqa turýǵa ótinish bildiredi. Iаǵnı, «HR-process» aqparattyq portalynda jumys izdeýshi azamat ózi týraly tolyq aqparatty engizip, upaı jınaıdy. Joǵary upaı jınaǵan azamat avtomatty túrde qaladaǵy memlekettik medısınalyq uıymdarǵa jumysqa qabyldanady.
Aıta keteıik, bul jobanyń maqsaty kandıdattar úshin densaýlyq saqtaý mekemeleriniń ózekti bos oryndaryna qoljetimdilikti qamtamasyz ete otyryp, kadrlardy irikteý kezinde sybaılas jemqorlyqty aldyn alý bolyp tabylady.
Búginde qaladaǵy memlekettik medısına mekemelerinde anestezıolog, reanımatolog, revmatolog, ınfeksıonıst jáne pedıatr syndy mamandyqtary boıynsha 120-dan astam dárigerlerdiń bos orny bar.