Nur-Sultan qalasy ákimdiginiń «Astana jastary» KMM «Nur-Sultan qalasy jastar saıasaty máseleleri basqarmasy» MM birlesip, Qabanbaı batyr dańǵyly, 5 meken jaıynda ornalasqan erekshe qajettilikteri bar balalarǵa, ata-ana qamqorlyǵynan aıyrylǵan balalarǵa jáne áleýmettik osal otbasylardan shyqqan balalarǵa arnalǵan «Babytown» jalpy bilim berý-saýyqtyrý ortalyǵynyń bazasynda jańa aýla klýbyn ashty. Bul týraly Egemen.kz qala ákiminiń baspasóz qyzmetine silteme jasap habarlaıdy.
Aýla klýbynyń ashylýyna halyqaralyq dárejedegi sport sheberi, para bıden álem birinshiliginiń 2017 jylǵy chempıony, para bı boıynsha álem chempınonatynyń 2019 jylǵy qola júldegeri Ardaq Otarbaev qatysty.
Klýbta karate, júzý sııaqty sport seksııalary, al shyǵarmashylyq úıirmelerden sýret salý, bı, balshyq terapııasy, mektepke daıyndyq kýrstary, sondaı-aq massaj terapııasy ashylady.
«Jastar saıasatynyń basty baǵyttarynyń biri – óskeleń urpaqty salaýatty ómir saltyn ustanyp, eline eseli eńbek etetin deni saý azamat bolyp ósýine sebin tıgizetin ártúrli múmkindikterdi jasaý. Sondaı-aq balalardyń bos ýaqytyn utymdy paıdalanýyna, áleýmettik az qamtylǵan otbasylardaǵy balalardyń ózi qyzyǵatyn sport nemese óner túrlerimen aınalysýyna qolaıly orta ázirleý de nazarymyzdan tys qalyp kórgen emes. Búgin mine osy maqsatta elordadaǵy 24-aýla klýbyn ashyp otyrmyz. Ortalyq erekshe qajettilikteri bar balalarǵa, jetim balalarǵa jáne áleýmettik osal otbasylardan shyqqan balalarǵa aqysyz qyzmet kórsetedi. Qala ákiminiń tapsyrmasy boıynsha mundaı aýla klýbtary qalamyzda áli kóptep ashylady», dedi klýbtyń ashylýyna qatysqan qalalyq Jastar saıasaty máseleleri basqarmasynyń basshysy Qaırat Telmanuly.