Kúni keshe Sarysý aýdany, Jańatas qalasynda oryn alǵan jantúrshigerlik oqıǵanyń sebepteri anyqtaldy, dep habarlaıdy Egemen.kz.
Qaladaǵy turǵyn úıden shyqqan órt oqıǵasy tez tutanǵysh materıaldyń betine ashyq ot kóziniń túsýi saldarynan týyndaǵan. Búgin óńirlik kommýnıkasııalar qyzmetiniń aqparat alańynda ótken brıfıngte Jambyl oblystyq polısııa departamenti bastyǵynyń birinshi orynbasary Baqyt Rataev órt faktisi boıynsha Qazaqstan Respýblıkasy Qylmystyq kodeksiniń 292-babynyń 3-bóligi, órt qaýipsizdigi talaptaryn buzý boıynsha sotqa deıingi tergeý bastalǵanyn málimdedi. «Sot-saraptama ortalyǵy mamandarynyń aldyn-ala málimetteri boıynsha, ólim ýly gazdan ýlanýdan, al órttiń ashyq ot kózi tutanǵysh materıaldyń, ıaǵnı tósek-oryn jabyndarynyń betine tıgeninen bolǵan. О́rttiń qorytyndy sebepteri barlyq qajetti saraptamalardyń nátıjeleri boıynsha jarııalanatyn bolady», dedi Baqyt Rataev.
Sonymen qatar, Jambyl oblystyq tótenshe jaǵdaılar departamentiniń bastyǵy Ermek Mombaev órt-tehnıkalyq zerthanasynyń aldyn-ala zertteý málimetterin jarııalady. «О́rt bes qabatty turǵyn úıdiń úshinshi qabatyndaǵy úsh bólmeli páterde oryn aldy. Ot balalar bólmesinde tutanǵan. Jalyn 16 sharshy metr aýmaqty qamtyǵan. Jyljymaly órt-tehnıkalyq zerthanamen zertteý júrgizý kezinde oqıǵa ornynda janǵan symdar men elektr jabdyqtary, pesh nemese basqa da qosymsha jylytý quraldary tabylmady, úı ortalyq jylytýǵa qosylǵan», dedi Ermek Mombaev. Al, Jambyl oblysynyń ákimi Berdibek Saparbaevtyń tapsyrmasymen qurylǵan arnaıy komıssııanyń tóraǵasy, oblys ákiminiń orynbasary Ulan Jazylbek zardap shekken otbasyna barlyq qajetti kómek kórsetiletinin atap ótti. «Oqıǵanyń barlyq mán-jaıyn anyqtaý úshin oblys ákiminiń ókimimen komıssııa quryldy. Onyń quramyna jergilikti atqarýshy organdardyń, prokýratýranyń, polısııa departamentiniń, tótenshe jaǵdaılar departamentiniń jáne basqa da jaýapty memlekettik organdardyń ókilderi endi. Kesheden beri komıssııa músheleri qaıǵyly oqıǵa ornynda bolyp, jumys júrgizýde. Bizdiń tarapymyzdan barlyq qajetti kómek kórsetiledi. Sonyń ishinde psıhologııalyq kómekti jáne jerleý rásimin uıymdastyrýǵa qol ushyn beremiz», degen Ulan Jazylbek qara jamylǵan otbasyna kóńil aıtty. Ákim orynbasarynyń aıtýynsha, otbasy tolyqqandy. Balalardyń ákesi jumys isteıtin bolsa, anasy muǵalim bolyp eńbek etedi. Alaıda, qazirgi ýaqytta dekrettik demalysta eken. Sondaı-aq, Ulan Jazylbek áleýmettik jelilerde órtten zardap shekken 60 jastaǵy áıel týraly qaýesetti joqqa shyǵardy. «Bul aqparat shyndyqqa janaspaıdy. Basqa zardap shekkender joq», dedi ol.