Soltústik Qazaqstan oblysynda eki jeńil kólik soqtyǵysyp, 45 jastaǵy er adam kóz jumdy.
SQO polısııa departamenti baspasóz qyzmetiniń málimetinshe, jol-kólik oqıǵasy «Jezqazǵan-Petropavl» avtojolynyń 830 shaqyrymynda bolǵan. Nıkolaevka eldi mekenine burylysqa 5 shaqyrym qalǵanda «VAZ-21150» avtokóliginiń júrgizýshisi qarsy kele jatqan «Toyota Land Cruiser 200» kóligimen soqtyǵysqan. Reseılik kólikti tizgindegen Shal aqyn aýdany Sergeevka qalasynyń 45 jastaǵy turǵyny oqıǵa ornynda mert boldy. Onyń úsh jolaýshysy, sonyń ishinde 6 jasar bala da bar, túrli jaraqatpen aýrýhanaǵa jetkizildi.
«Toyota» kóliginiń júrgizýshisi, Petropavl qalasynyń 30 jastaǵy turǵynynyń aıtýynsha, «VAZ-21150» kóligi júk kóligin basyp ozbaq bolǵan. Sheteldik kóliktegi jolaýshyǵa medısınalyq kómek kórsetilgennen keıin úıine jiberildi. Bul derek «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha Sotqa deıingi tergep-tekserýlerdiń biryńǵaı tizilimine engizildi.
«Qazirgi ýaqytta osy oqıǵaǵa baılanysty tergeý amaldary júrgizilip jatyr. Qysta jolda asa muqııat bolý qajettigin kólik júrgizýshileriniń esine salamyz. Júk kólikterinen keıin qar quıyny paıda bolyp, kórinis shekteledi. Sol sebepti saqtyqty umytpaǵan jón», deıdi Esil aýdandyq polısııa bólimi bastyǵynyń orynbasary Sáken Rahmetov.