Bul týraly petropavldyq polıseıler qala kolledjderiniń shákirtterimen ótken kezdesýde sóz qozǵady. Jyl basynan oblys ortalyǵynda stýdentterge qatysty jasalǵan 4 ınternet-alaıaqtyq faktisi tirkelgen.
Barlyq jaǵdaılarda stýdentter OLX saıty arqyly uzaq merzimdi jalǵa arzan baǵamen beriletin turǵyn úı izdestirgen. Qolaıly usynysty kezdestirgen stýdentter kórsetilgen nómir boıynsha qońyraý shalady. Páter ıesi úıin jalǵa beretinin, biraq kez-kelgen ýaqytta kóshýge daıyn adamdardyń bar ekenin alǵa tartyp, tek aldyn ala tólem jasaǵanǵa ǵana beretinin aıtqan. Bul usynysty tıimdi kórgen stýdentter aqshany kórsetilgen shotqa aýdarǵan. Al qarajatty qolǵa túsirgen soń «úı ıesi» ǵaıyp bolǵan. Qazirgi ýaqytta polıseıler qaskóılerdi ustaý úshin jedel-izdestirý is-sharalaryn júrgizýde.
Polısııa qyzmetkerleri kezdesýge kelgen stýdentterge osyndaılardyń quryǵyna túsip qalmaý jaǵyn eskertti. Qazir atalǵan qylmys túriniń statıstıkasy byltyrǵymen salystyrǵanda eki esege artyp, jyl basynan beri oblys ortalyǵynda 60-tan astam ınternet-alaıaqtyq faktisi tirkelgen.