JEŃIS ESTAFETASY О́SKEMENGE KELIP JETTI

Uly Jeńistiń 65 jyldyǵyna sanaýly kúnder qaldy. Otan úshin ot keship, qasyq qany qalǵansha arpalysqan, bolashaq urpaqtyń beıbitshiligi men yntymaǵy jolynda janyn aıamaǵan bozdaqtardy qalaı umytaıyq. TMD Memleket basshylary Keńesiniń jáne TMD Shekara áskerleri basshy­lary keńesiniń sheshimine sáıkes Uly Otan soǵysyndaǵy Jeńistiń 65 jyldyǵyna oraı ekinshi aqpanda eki baǵytta Estafeta alaýynyń sherýi bastalǵan. Birinshisi – Belarýs Respýb­lıkasynyń Grodno qalasy, odan ári Ýkraına, Moldova, Armenııa arqyly Más­keýge, al ekinshisi – Reseıdiń Mýr­mansk qalasy, Qazaqstan, Qyrǵyzstan, Tájikstan, О́zbekstan, Túrkimenstan, Ázirbaıjan arqyly Máskeýge kelip, túıisýleri tıis. Mine, keshe Jeńis estafetasy О́skemenge keldi. Uly Otan soǵysy bozdaqtaryna arnalǵan Dańq memorıalynda áskerı quramalar men shekara qyzmeti sarbaz­dary saltanatty sherýge ázir tur. Bul jerde soǵys ardagerleri men qaladaǵy orta mektepterdiń oqýshylary jaýyn­gerlik kıimderimen sapta. Dıktordyń qýatty daýysynan keıin ortaǵa Reseı Federasııasy Shekara qyzmetiniń bir top jaýyngerleri QR UQK Shekara qyzmetiniń úsh sarbazyna Jeńis estafetasy sımvolyn saltanatty jaǵdaıda tapsyrdy. Budan keıin Shyǵys Qazaqstan oblysy ákiminiń orynbasary Túsiphan Túsipbekov sóz alyp, Uly Jeńistiń 65 jyldyǵyna arnalǵan Jeńis estafeta­synyń Kendi Altaıǵa kelýinde úlken mán jatqanyn, keshegi surapyl soǵysta Shyǵys Qazaqstannan shaqyrylǵan 170 myń jaýyngerdiń 95 myńy keleshek urpaq úshin jandaryn pıda etkenin tilge tıek etti. Surapyl soǵystan qaıǵy-qasiret shekpegen birde-bir otbasy joq shyǵar. Reseı men Qazaqstan, basqa da TMD elderiniń soǵys apatynan qansha zardap shekkenderin, alaıda birligi men tirligi jarasqan qanshama ult ókilderiniń yntymaǵy jemisin bergenin tilge tıek ete ketti. Budan keıin Altaı ólkesi ákimshiligi departamentiniń bastyǵy Igor Gnıdenko sóz alyp, estafetany berik qolǵa tapsyr­ǵandaryn aıtyp ótti. Al QR She­kara qyzmeti dırek­to­ry­­­nyń oryn­basary Amangeldi Ábil­hanov Jeńis estafeta­synyń 22 sáýir jáne 2-shi mamyrda Qytaı Halyq Respýblı­kasy­men ara­daǵy memleket­tik shek­ara boıymen Shyǵys Qa­zaqstan, Al­maty já­ne Jambyl ob­lys­tary arqyly óte­tinin habar­lady. Eki eldiń Án­uran­­­dary oı­na­lyp bol­ǵan soń ob­lys ákim­digi men kórshi Reseı ólke bas­shylary­nyń soǵys qur­bandaryna arnalǵan gúl shoqtary qoıyl­dy. Máńgilik alaýǵa soǵys ardageri, So­sıa­lıstik Eńbek Eri Qaı­rolla Baqty­baev, Frýnze Jaqsy­lyqov, basqa da arda­gerler gúl shoqtaryn qoıdy. Budan keıin án men kúıge kezek berilip, jaýyn­gerler sap túzep, jınalǵandarǵa qurmet kórsetti. Ońdasyn ELÝBAI. О́SKEMEN.