Bıyl altynshy márte tamasha merekeni – Alǵys aıtý kúnin atap ótip otyrmyz. Bul – naǵyz jarqyn ári rýhanı meıram. Sondaı-aq osy erekshe kúndi Qazaqstan halqynyń baýyrmaldyǵynyń, meıirimdi júregimizdiń, jan tazalyǵynyń aıqyn kórinisi der edim. Tipti naǵyz rýhanı kamerton desem, qatelespeımin.
Alǵys aıtý kúni Qazaqstan halqy Assambleıasynyń qurylǵan kúnimen birge toılanady. Qazaqstandaǵy eń jańa merekeniń óz tarıhy men qoltańbasy bar. Menińshe, bul meıram Qazaqstan halqy Assambleıasynyń týyndysy ispetti. Osy prezıdenttik ınstıtýttyń qabyrǵasynda Alǵys aıtý kúnin toılaý jóninde bastama kóterilgen. QHA osy erekshe merekeniń paıda bolýyna zor úles qosty.
Elbasy Nursultan Nazarbaev 1995 jylǵy 1 naýryzda negizin qalaǵan Qazaqstan halqy Assambleıasy rýhanı mektep, tipti akademııaǵa aınaldy. «Jaqsy adam – ózgelerge kómektesken, qamqorlyq tanytqan adam» degen naqyl bar. Biz osyny kúndelikti jasaýymyz qajet. Alǵys aıtý kúnimen shektelip qalmaı, jyl boıy jalǵastyrý kerek dep esepteımin.
Osy oraıda, elimizdegi aıryqsha meıramda barsha qazaqstandyqtardyń rýhanı asqaqtap, jan-júregi tazarýyn tileımin. Dál osy kúni eń jyly sóz – «rahmet»-ti myńdaǵan adamǵa aıtaıyq. Ata-anamyzǵa, baýyrlarymyzǵa, dostarymyzǵa, týystarymyzǵa alǵysymyzdy jetkize bereıik.
Antıka dáýiriniń áıgili fılosofy Demokrıttiń «Biz dostarymyzdan kómek qana kútip qoımaımyz, olardyń qol sozatynyna senimdilikti de qajet etemiz», degen tamasha sózi bar. Dostaryńnyń jerge tastamaıtynyna senimiń barda, ómirdiń máni men mańyzy arta túsedi.
Qazaqstandyqtarda ata-anasyna, týǵan-týystaryna, dostaryna, baýyrlaryna alǵys aıtatyn kóptegen sebep bar. Biraq eń basty rahmet – meıirban, Qudaıdyń meıiri tógilgen qazaq jerine aıtylýǵa tıis. Onyń óte tolerantty, ǵajaıyp turǵyndary – qazaq halqyna aıtýymyz qajet.
Biz biregeılik týraly aıtamyz. Al Qazaqstan qoǵamynyń basty biregeıligi – Alǵys aıtý kúni. Atalǵan mereke qazaqstandyqtar rýhanı azyq alatyn, memlekettik qurylymymyzdy nyǵaıtatyn kúnge aınalyp keledi.
Tipti bul mereke tek Qazaqstanmen shektelip qalmaq emes. Qazirgi tańda sheteldegi dostarymyz da osy bir erekshe meıramdy toılap, bizdiń elimizde ótkizgen umytylmas kezderin saǵynyshpen eske alyp júr.
Anatolıı BAShMAKOV,
QHA Keńesiniń múshesi, Prezıdent janyndaǵy Memlekettik basqarý
akademııasy Soltústik Qazaqstan
oblysy fılıalynyń professory