Aıaz qysqan aqpan aıynyń ortasynda Talǵar aýdanyndaǵy bir shańyraqta órt shyǵyp, tótenshe jaǵdaı bolǵan edi. Qıyndyqqa tap kelgen áýlette shıettteı bala-shaǵa bar-tyn. Oqys oqıǵa alty balaly otbasyn ábigerge salǵan bolatyn, dep habarlaıdy Egemen.kz
Taldybulaq aýylyndaǵy bul jaǵdaı aqparat quraldary arqyly elge tez taraldy. Jaǵdaıdan habardar bolǵan Almaty oblysynyń ákimi Amandyq Batalov aýdandaǵy azamatarǵa tıisti kómek uıymdastyrý týraly tapsyrma bergen. Endi mine, ákimniń bastamasyna óńirdegi mesenattar ún qatyp, taǵdyr talqysynda qalǵan áýletke baspana syılady. Jaqynda alty balaly otbasyna «Gorızont KZ» kompanııasy Talǵar qalasynan úı satyp áperdi.
– Tún ortasy aýa túsiniksiz bir dybystan oıanyp kettim. Dalaǵa shyqsam, úıimizdiń shatyry janyp jatyr eken. Kúıeýim kúzetshilik jumysta bolatyn. Alǵashynda sasqalaqtap qaldym, biraq úlken balalarym tez esimdi jıǵyzyp, bárimiz jyldam kıine bastadyq, órt sóndirýshilerdi shaqyrdyq. Tek qujattarymyzdy ǵana alyp úlgerdik. Bul oqıǵa 25 aqpanda boldy. Biz týrasyn aıtqanda kóshede qaldyq. Biraq búgin sol qıyndyqtyń bári artta qalyp, qatty qýanyp otyrmyz. О́z úıimiz bar degenge áli de sene almaı turmyn. Bes ulym, bir qyzym bar. Úlkenim 8 synypta oqıdy, kishkentaıym 7 aılyq. Endi olardyń óz úlken úıleri bar. Bizdi qıyn sátte jalǵyz qaldymaı, kómek qolyn sozǵan jandarǵa alǵys aıtamyn. Oblys ákimine, mesenattarǵa, aýdan ákimdigine, jýrnalısterge, bizdi qoldaǵan barsha azamattarǵa rızashylyǵym sheksiz, – deıdi qaıyrmdy jandardyń arqasynda baspanaly bolǵan kóp balaly ana Aıgerim Talqanbaeva.
Aıtpaqshy, Almaty oblysynda byltyr 1258 kóp balaly otbasy qonys toıyn toılaǵan. Onyń ishinde 180 úı aımaqtaǵy mesenattardyń qarjysyna satyp alynypty.