Memleket basshysy Sheteldik ınvestorlar keńesiniń jumys kezdesýine qatysty, dep habarlaıdy Egemen.kz
Onlaın formattaǵy kezdesýge Royal Dutch Shell plc konserniniń bas atqarýshy dırektory Ben van Bıorden, Chevron korporasııasynyń óndirý máseleleri jónindegi vıse-prezıdenti Djeıms Djonson, CNPC korporasııasynyń vıse-prezıdenti Hýan Iýn Chjan, Eni S.p.A kompanııasynyń upstream bıznes jónindegi dırektory Gýıdo Brýsko, ExxonMobil Global Projects kompanııasynyń prezıdenti Nıl Daffın, Total E&P kompanııasynyń Kaspıı jáne Ońtústik Eýropa jónindegi vıse-prezıdenti Krıstın Hılı qatysty.
Prezıdent jıynǵa qatysýshylarǵa iltıpat bildirip, munaı-gaz salasy Qazaqstanyń damýynda erekshe mańyzdy ról atqaratynyn atap ótti. Qasym-Jomart Toqaevtyń pikirinshe, álemdik saýda men ekonomıkanyń birtindep qaıta qalpyna kelýiniń arqasynda, biz munaı-gaz sektorynyń halyqaralyq deńgeıdegi, sondaı-aq, el ishindegi jaǵdaıyna zor úmit artyp otyrmyz.
– Sondyqtan biz osy oń dınamıkany paıdalanyp, uzaq merzimdi perspektıvada atalǵan salanyń ınvestısııalyq tartymdylyǵyn arttyrý jónindegi aldaǵy baǵyt-baǵdarymyzdy aıqyndap alýymyz kerek, – dedi Memleket basshysy.
Qazaqstan Prezıdenti Keńestiń 2020 jyldyń qarasha aıynda ótken jumys kezdesýiniń qorytyndylary boıynsha birlesken esebin tyńdap, aıtarlyqtaı nátıjelerge qol jetkizilgenin aıtty.
Osy rette Memleket basshysy birqatar mańyzdy málimdeme jasady.
Atap aıtqanda, Qasym-Jomart Toqaev iri munaı-gaz jobalary boıynsha jasalǵan ýaǵdalastyqtardyń ýaqtyly iske asyrylýyna nazar aýdardy.
Prezıdent Úkimet pen ınvestorlardyń túsinistikke kelgenin, endi osy kelisimderdi tolyqtaı júzege asyrýdy qamtamasyz etýdiń jáne jedel sheshim qabyldaýdyń mańyzdylyǵyn atap ótti.
– Pandemııaǵa qaramastan Teńiz kenishin keńeıtý jobasy kestege sáıkes iske asyp jatyr. Qarashyǵanaq ken ornyn keńeıtý jobasy boıynsha túpkilikti ınvestısııalyq sheshimniń qabyldanýy – júıeli jumystyń taǵy bir mysaly. Qazirgi ýaqytta biz Qashaǵandy damytýdyń aýqymdy josparynyń qabyldanýyn kútip otyrmyz, – dedi Qasym-Jomart Toqaev.
Sonymen qatar Memleket basshysy Úkimettiń ınvestısııa tartýdyń jańa tetikteri usynylǵan baıandamasyna, onyń tıptik kelisim-sharttardy jetildirý bóligine basa mán berdi.
Prezıdent bul usynystardy qoldap, ınvestısııanyń quqyqtyq turǵydan qorǵalýyn jáne turaqtylyǵyn qamtamasyz etýdi, sondaı-aq, qajet jaǵdaıda ınvestısııalyq jeńildikter jasaýǵa tıisti mehanızmderdiń bárin muqııat pysyqtaý qajettigin aıtty.
– Barlyq jobanyń geologııaǵa, naryqtan shalǵaı ornalasýyna, munaı túrlerine baılanysty óz erekshelikteri bolǵandyqtan, «birkelki ádisten» qashýymyz kerek. Úkimet jobalardy kúrdeliligi men mańyzdylyǵy boıynsha júıelep, olardy retteýdiń jáne qoldaýdyń tıisti tetikterin aıqyndaýy qajet, – dedi Qasym-Jomart Toqaev.
Osyǵan baılanysty Memleket basshysy Úkimetke jumys tobynyń kelesi otyrysyna jetildirilgen tıptik kelisim-sharttyq mehanızm ázirleýdi tapsyrdy.
Budan bólek Prezıdent kómirsýtegin qaıta óńdeýde ınvestısııany retteýdiń zamanaýı jáne ońtaıly tetigin ázirleý qajettigin aıtty.
Memleket basshysy jergilikti ónimdi arttyrý máselesine arnaıy toqtaldy. Bul rette ol tehnologııa transfertin jáne óndiristi bir jerge shoǵyrlandyrýdy qamtamasyz etý úshin naqty sharalar ázirleý jóninde Úkimetke bergen tapsyrmasyn eske saldy.
– Men elishilik qundylyq (in-country value) qalyptastyrýda, ishki tehnologııalyq jáne ónerkásiptik damýdy yntalandyrýda energetıkalyq jobalardyń mańyzdylyǵyn únemi aıtyp kelemin. О́kinishke qaraı, bul baǵyttaǵy progress máz emes. Bizge tyń ári batyl qadamdar jasaý kerek, – dedi Prezıdent.
Qasym-Jomart Toqaev Úkimetke kompanııalarmen birlesip, Tehnologııalar transferti men lokalızasııa jóninde jol kartasyn ázirleýdi jáne bul jaıynda kelesi otyrysta baıandaýdy tapsyrdy.
Memleket basshysy jýyrda qurylǵan Investorlardyń problemasyn sheshý jónindegi front-ofıs týraly da aıtty. Onyń pikirinshe, bul ofıstiń jumysy kásibı, belsendi júrgizilip, bıýrokratııalyq resimder barynsha az bolýy kerek. Ofıs ınvestorlardyń jumysyna kedergi keltiretin problemalardy sheshýge quzyretti bolýǵa tıis. Eger qajet bolsa, máseleni Premer-Mınıstr janyndaǵy Munaı-gaz keńesiniń deńgeıine kóterý kerek.
Prezıdent ekologııalyq máselelerge nazar aýdardy. Bul rette Memleket basshysy munaı-gaz kompanııalarynyń gazdy fakelderde jaǵyp jiberý kezinde shyǵatyn qaldyqtarǵa salynatyn tólemderdiń ár kelkiligi jónindegi ótinishterin qoldaıtynyn atap ótti.
Qasym-Jomart Toqaev bul máselelerge qatysty ınvestorlardan qorshaǵan ortany jaqsartý men kómirtegi qaldyǵyn azaıtý jóninde batyl ári naqty is-qımyldar kútetinin málimdedi.