Oqyrmannyń esinde bolsa, aqpannyń basy jylymyq bolyp, Soltústik Qazaqstannyń tótenshe jaǵdaılar qyzmeti sol kezden qarǵyn sýdyń tasqynyna qarsy sharalardy belgileı bastaǵanyn «Egemenge» jazǵan bolatynbyz. Biraq aqpan aldap túsirgen eken. Basy jumsaq bolǵanymen 4-5 kúnnen keıin 30-35 gradýsqa deıin jetetin aıaz bolyp, at qulaǵy kórinbeıtin dúleı borandar soǵyp, aqpan aqyryp berdi. Úımelep túsken qarmen arpalys tipti qarǵyn sýyn da umyttyryp jibergen edi. Alaıda naýryzdyń kúni kúlimsirep týyp, tasqynnyń alysta emes ekenin qaıta eske túsirdi. Osyǵan baılanysty oblystyq ákimdiktiń kezekti otyrysy tasqynnyń aldyn alý sharalaryna arnaldy. Onda tıisti qyzmetter tasqynnyń ózderine qatysty máselelerin baıandap berdi.
«Qazgıdromettiń» soltústikqazaqstandyq fılıalynyń dırektory Qymbat Merǵalymovanyń aıtýyna qaraǵanda, naýryzdyń aýa raıy turaqsyz bolmaq. Boljam boıynsha arasynda qar aralas jańbyr jaýatyn kórinedi. Aıdyń jalpy jylymyǵy jyldaǵy normadan 1-2 gradýs joǵary bolmaqshy. Úshinshi onkúndikte aýa raıy keıbir jerlerde 12 gradýsqa deıin jylynýy múmkin. Soltústik úshin bul asa qaýipti. О́ıtkeni jerdiń tońy 114 sm-ge deıin qatqan, bul ýaqytta ol áli jibip úlgermegendikten qardyń sýy jerge sińe almaı úlken tasqyn týdyryp, úılerdi, joldardy basyp qalý qaýpi bar.
Petropavl qalasynyń ákimi Bolat Jumabekov barlyq sýaǵarlar ashylǵanymen 240 úı sý astynda qalýy múmkin ekenin aıtty. Ákimniń aıtýyna qaraǵanda, olardyń turǵyndaryn evakýasııalaıtyn oryndar osy bastan saılanyp qoıylǵan. Oǵan ázirge úsh mektep úıi belgilengen. Qaladan qar shyǵarý jumystary qyzý júrgizilýde, alaıda jekemenshik sektordyń úıilgen qary tasylyp bolatyn emes.
Bıyl Esil ózenindegi qardyń qalyńdyǵy ortasha normadan 60 paıyzǵa artyq. Ǵ.Músirepov jáne Shal aqyn aýdandaryndaǵy qar tipti jyldaǵydan eki ese qalyń. Otyrysta oblys ákimi Q.Aqsaqalov qyzmetterdiń basshylaryna kórshiles oblystarmen de yntymaqtasyp jumys isteý kerektigin eskertti. «Kórshilermen tyǵyz baılanysyp, jedel aqparattarmen almasyp otyrý mindet», dedi ol.
Tótenshe jaǵdaılar jónindegi departament basshysy Ramıl Kamalovtyń aıtýyna qaraǵanda, Esil, Shaǵalaly, Sileti, Qamysaqty ózenderiniń tasýy – eń úlken qaýip. Kúzgi ylǵaldyń jınalýy olarda jyldaǵydan orta eseppen alǵanda 36 paıyz artyq. Soltústiktegi eń kóp sý Sergeev sý qoımasynda. Ondaǵy sý deńgeıi qazir 610,8 mln tekshe metr, al muzdyń qalyńdyǵy 70 sm. Demek, muz erigende sýdyń qoımadan asyp ketetini qazirdiń ózinde belgili. О́ıtkeni qoımanyń barlyq syıymdylyǵy 693 mln tekshe metr. Qazir departamentte tasqynǵa qarsy jumystardy úılestiretin shtab qurylǵan. Oǵan azamattyq qorǵanys salasynyń qyzmetkerleri de qatystyrylýda. Shtab búgingi tańda 6 myń turǵyny bar 79 eldi mekendi baqylaýǵa alyp otyr. Sonymen qatar 92 eldi meken nazarǵa alynǵan.
Barlyq quqyq qorǵaý organdarynyń 484 qyzmetkeri men 155 tehnıkalyq quraly tasqynǵa qarsy kúresýge daıyn. TJ departamentiniń ózinen bul kúreske 264 adam kúshi men 51 tehnıka, Ulttyq ulannan 60 adam men 3 tehnıka qatystyrylady. Al qalǵan 160 adam men 101 tehnıka Polısııa departamentinen tartylatyn bolady.
Jaǵdaı shıelenisip, shekten shyǵyp, tasqyndy quryqtaýǵa kúsh kelmeı jatsa, jergilikti atqarý organdary 1912 adam kúshi men barlyǵy 1478 tehnıka, sonyń ishinde 316 sý aıdaǵysh tehnıka qosatyn bolady. Tehnıkalarǵa 687 tonna janar-jaǵarmaı daıyndalǵan. Sonymen qatar qum men topyraq bógetterin jasaýǵa 24,8 myń qapshyq jınalǵan. Qarajat kúshine keletin bolsaq, ázirge 895,6 mln teńgeniń shyǵyny bekitilgen. Qala ákimi Bolat Jumabekovtiń baıandamasyn tyńdaǵanda oblys ákimi qosymsha qarajat kerek pe dep surady. Naýryzda taǵy da qar túsetinin eskergen qala ákimi qosymsha qarajat qajet bolatynyn aıtty. Qumar Aqsaqalov bul ótinishtiń qanaǵattandyrylatynyn jetkizdi.
Osyndaıda bárinen de úreı men dúrbeleń qaýipti. Mundaıdy týdyrǵysy kelip, alaqanyna túkirip júretin baıbalamshylar da kóp bolady. Sondyqtan oblys ákimi aqparattyń bir jerden ádiletti túrde berilip turýyn qadaǵalaýdy óziniń orynbasary Ǵanı Nyǵymetovke tapsyrdy. «Qajet bolsa ózim de kúnde BAQ quraldary arqyly halyqqa shyǵyp, jaǵdaıdy aıtyp otyratyn bolamyn», dedi ol. Sonymen qatar oblys ákimi óńirdegi barlyq 1400 sýaǵar arshylyp, sý joldaryna kedergi bolmaýyn qatty eskertti.
Qaýip 2017 jylǵydan bıyl da kem bolmaıtyn sııaqty. Eń bastysy, jerdiń tońy jibimeı jatyp kún ysyp ketip, qar kúrt erise qatty qaýip sol bolǵaly tur. Biraq saqtanǵan qaı kúnde saý bolary sózsiz, sondyqtan saqtyq jumystaryn barynsha jedeldete bergen durys. Ol úshin kúres shtaby kúndiz-túni jumys isteıtin boldy.