Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentimen ótken jyly bilim berý salasynda 29 qylmystyq quqyq buzýshylyq derekteri tirkelgen. Búl salada búginde sybaılas jemqorlyq kórinisteri jıi kezdesedi.
Osyǵan oraı, bilim berý ordalarynda týyndaıtyn barmaq basty, kóz qysty áreketterdiń deńgeıin tómendetý jáne sybaılas jemqorlyq quqyqbuzýshylyqtarynyń aldyn alý maqsatynda departament bastamasymen oblysqa qarasty bilim berý uıymdarynyń basshylarymen kezdesý ótkizildi. Alqaly jıynǵa departament basshysynyń birinshi orynbasary Mıras Qarǵabaı, oblystyq adamı áleýetti damytý basqarmasynyń basshysy Raqymbek Jolaev jáne aýdan, qalalyq bilim bólimderiniń basshylary qatysty. Jıynda sóz alǵan Mıras Qarǵabaı óńirde aldyn alý jumystarynyń júıeli túrde júrgizilip jatqandyǵyna qaramastan, bilim bólimderi oblystyq basqarmanyń qaramaǵyna ótýine baılanysty qujattardy rásimdeýge, antıseptık alýǵa, olımpıadadan júldeli oryndardy sarapqa salýda, attestattaýdan ótkizýge, júrgiziletin tekserýlerde muǵalimderden júıeli túrde qarjy jınaý derekteri jáne kadr máselesin sheshý, sertıfıkat pen dıplom berý, memlekettik baǵdarlamalarǵa qarastyrylǵan qarjyny talan-tarajǵa salý, memlekettik satyp alýdy ótkizý barysynda da jemqorlyq kórinisteri jıi oryn alyp jatqandyǵyn jetkizdi.
Soǵan sáıkes, departamenttiń bastamasymen qala, aýdandyq bilim bólimderiniń basshylaryna túrli is-sharalarǵa májbúrli túrde qarajat jınaýǵa tıym salý, ózderine málim bolǵan sybaılas jemqorlyq áreketterdi tıisti organdarǵa habarlaýǵa mindettelý jáne barlyq nysandaǵy bilim berý uıymdarynyń kitaptar pen bıletter satýǵa, oqý ornynyń qajettilikteri úshin zańsyz aqsha jınaýǵa jol bermeý úshin basqarma basshysy R.Jolaevtyń qol qoıýymen «Sybaılas jemqorlyqqa qarsy is-qımyl sharalaryn kúsheıtý jáne jaýapty tulǵalardy belgileý týraly» buıryq zańdy kúshine engendigi atap ótildi. Jemqorlyqtyń aldyn alý qarqynyn arttyrý maqsatynda departament pen basqarma birlese otyryp, aldaǵy ýaqytta sybaılas jemqorlyq táýekelderine syrtqy taldaý jumystaryn júrgizedi jáne belgili bir merzimge qurylǵan naqty jospardyń aıasynda aýqymdy sharalar atqarylady.