Áleýmettik jelilerde keıbir qazaqstandyq paıdalanýshylar COVID-19 PTR-testileý nátıjesin burmalaý týraly aqparatpen bólisýde. Bul zańsyz. Qazaqstanda jalǵan qujattar daıyndaý jáne paıdalaný úshin jaýapkershilik qarastyrylǵan, dep habarlaıdy Egemen.kz stopfake saıtyna silteme jasap.
Áleýmettik jelilerde taratylyp jatqan jarııalanymda Telegram-chatqa aparatyn silteme kórsetilgen. Onda COVID-19 PTR-testileýdiń teris nátıjeleri bar blankiler usynylǵan. Chatty qurýshynyń aıtýynsha, bul úlgilerdi adamnyń aty-jóni men kúndi engizý arqyly ózgertýge bolady.
Densaýlyq saqtaý mınıstrligi taldaý nátıjeleri bar jalǵan blankilerdi túpnusqadan ajyratý jáne olardyń durystyǵyn tekserý ońaı ekenin atap ótti.
«Komıtettiń «Ulttyq saraptama ortalyǵy» fılıaldary usynǵan zertteý hattamalarynyń túpnusqalyǵyn zerthanalyq aqparattyq júıe (ZAJ) baǵdarlamasy arqyly sáıkestendirý mynadaı parametrler boıynsha júrgiziledi: ZAJ baǵdarlamasy bergen zertteý hattamasyndaǵy shtrıh kod; www.nca.kz saıtynda sáıkestendirýge bolatyn akkredıtteý attestatynyń nómiri kórsetilgen, Qazaqstan Respýblıkasynyń Ulttyq akkredıtteý organy bergen akkredıtteý belgisiniń bolýy; «Halyqtyń sanıtarııalyq-epıdemıologııalyq salamattylyǵy salasyndaǵy esepke alý jáne esep berý qujattamasynyń nysandaryn bekitý týraly» buıryqpen reglamenttelgen zertteýdiń árbir túrine arnalǵan zertteý hattamasynyń bekitilgen nysany. Nysanda zertteý oryndaýshysynyń, zerthana basshysynyń derekteri jáne uıymnyń móri kórsetilgen», dep habarlady vedomstvodan.
Qazaqstanda jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý zańsyz bolyp tabylady. Bul úshin QR QK 385-babyna sáıkes qylmystyq jaýapkershilik kózdelgen. Zań buzýshylar eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady. Kórineý jalǵan qujatty paıdalaný 160 AEK deıingi mólsherde aıyppul salýǵa ne 40 táýlikke deıingi merzimge qamaýǵa alýǵa jazalanady.
Sonymen qatar COVID-19 PTR taldaýynyń teris nátıjesi kórsetilgen blank jasaý qaýipti. Mundaı qujatty qoldanǵan adam is júzinde indetpen aýyryp, ony basqalarǵa juqtyrýy múmkin.