Tabıǵaty qatal teriskeı óńirinde týyp-ósken Rımma Daýrenbekova ósimdikter álemine jastaıynan qumar boldy. Bala kezinde kózdiń jaýyn alatyn ádemi gúlderdi ósirýdi serik etti. Sodan bolar, jastaıynan agronom bolýdy armandady.
Búginde ómirin ósimdikter álemimen baılanystyrǵan Rımma qyzmetinde úlgili, ónegeli otbasynyń otanasy atanyp otyr. Ońtústik Qazaqstan oblysy, Sozaq aýdany, Sholaqqorǵan aýylynda týyp-ósken Rımma aýdan ortalyǵyndaǵy Ahmet Baıtursynov jalpy orta mektebin úzdik bitirdi. Arman qýyp, Almaty qalasyndaǵy Qazaq memlekettik agrarlyq ýnıversıtetinde «agronom» mamandyǵyn oqydy. Jastaıynan tabıǵatqa, jer betindegi tirshilikke, ásirese, jyldyń tórt mezgilinde úlken ózgeriske ushyraıtyn ósimdik ataýlyǵa qumar qyz mamandyq tańdaýda qatelespegen-di. Joǵary oqý ornyn bitirgen soń týǵan jerge kelip eńbek etti. О́tken ǵasyrdyń 90-jyldaryndaǵy toqyraýda keńshar-ujymsharlar tarap, shaǵyn qojalyqtarǵa aınaldy. Osy kezde alǵashqy eńbek jolyn agroónerkásip, sharýa qojalyǵynda agronom bolyp bastady. Sharýa qojalyǵynda jumys istep júrip, óz salasynyń qyr-syryna qanyǵa tústi. Elimizdiń ózge óńirlerinen tabıǵaty erekshe Sozaqtyń tosyn minezin, onda ósetin ósimdikter álemin tereń tanydy. Izdenimpazdyǵy men iskerliginiń arqasynda 2007 jyly Sozaq aýdandyq aýmaqtyq ınspeksııasynyń bas mamany-ósimdikter karantıni jónindegi memlekettik ınspektory qyzmetine taǵaıyndaldy. Sodan beri osy qyzmetti abyroımen atqaryp keledi.
Jańalyqqa jany qumar Rımma Jógibaıqyzy osy jyldar aralyǵynda elimizdiń azyq-túlik qaýipsizdigin saqtap, fıtosanıtarlyq ahýaldyń turaqtylyǵyn qamtamasyz etýde óńirimizge ózindik jetistikterimen tanylǵan biregeı jan. Sonyń ishinde retteletin aýmaqta shetelderden nemese basqa da karantındi aımaqtan zattardyń zańsyz kelýinen qorǵaýdy qamtamasyz etýde asa belsendiligimen, minsiz qyzmetimen, jaýapkershiligimen tanyldy. Elimizdiń О́zbekstan Respýblıkasymen memlekettik shekarasy arqyly ótkiziletin ónimderine memlekettik baqylaý júrgizý kezinde halyqaralyq «Eýrazııalyq ekonomıkalyq odaqta ósimdikter karantınin qamtamasyz etý» sheshiminiń talaptaryna sáıkes kelmegen ónimderdi anyqtap, keri qaıtardy jáne 650 kılo ónimdi joıýǵa qatysty. О́zi týraly áńgimege sarań Rımmanyń bul − elge málim jetistikteri ǵana.
«Jumysym ózime unaıdy. О́simdikter álemi – janym qalaǵan mamandyǵym. О́zime júktelgen mindetti jaýapkershilikpen atqarýǵa tyrysamyn. Máselen, shetelge eksportqa shyǵarylatyn ósimdik tektes ónimderdi tekserip, qadaǵalaımyz. Qajet bolǵan jaǵdaıda Shymkent qalalyq karantındik zerthanasyna jiberemiz. Kúndelikti ishki saýda nysandaryndaǵy ósimdik ónimderin tekserip, talap saqtalmaǵan jaǵdaıda ákimshilik shara qoldanyp, aıyppul salamyz. Bul óz kezeginde aýdan turǵyndarynyń qaýipsizdigi úshin qajet», deıdi Rımma Jógibaıqyzy.
Rımmanyń iskerlik qabileti aýdandyq aýmaqtyq ınspeksııasynyń bas maman-ósimdikter karantıni jónindegi memlekettik ınspektory bolǵan kezde keńinen tanyla bastady desek qatelespeımiz. Sebebi óz salasyn jetik meńgergen maman sharýa qojalyǵy ıeleriniń arqasúıer aqylshysyna aınaldy. Qoǵamdyq jumysqa da belsene aralasady. Zamandastaryn turmysy tómen otbasylardyń balalaryn mektep formasymen qamtamasyz etý syndy ıgi iske uıymdastyrdy. Eńbegi elenip, Nur Otan partııasynyń aýdandyq fılıaly tóraǵasynyń, oblystyq, aýmaqtyq ınspeksııa basshysynyń alǵys hattaryn ıelendi. Abyroıly jan otbasy tirshiliginiń de uıytqysy. Otaǵasy Qanat Moldalıev ekeýi eki ul, eki qyz tárbıelep otyr. Úlken qyzdary Symbat Turar Rysqulov atyndaǵy Qazaq ekonomıkalyq ýnıversıtetinde oqıdy, al Janel − ál-Farabı atyndaǵy Qazaq ulttyq ýnıversıtetiniń stýdenti. Uldary Nurbaqyt pen Álıjan − aýdan ortalyǵyndaǵy Názir Tórequlov IT lıseıiniń oqýshysy. «Enem Baqyt Omarova uzaq jyldar aýdandyq tutynýshylar qoǵamynda jumys istedi. Búginde zeınette. Aıaýly ana, osy kisiniń tálim-tárbıesin kórdim. Alǵysym sheksiz. Qyryq jyldan asty, namazyn qaza etpegen kisi. Bizge jol siltep, nemerelerin tárbıelep otyrǵan baqytty áje», deıdi Rımma Jógibaıqyzy.
Túrkistan oblysy